AHOLE 19 - BAIBEL (BSI)

¹ Kumlhomi shianamu amikucho shi akeuno anikha shi miki akeu nguno akiviue.

² Akighithi kuhano aghuiloqhiye amlotsu keuye akivi kumoe, ngosumla keuno akupunalo osailove nani.

³ Timi khamiye panono mbomzushi mlaithakeu lono alikhi ashipusave cheni tishino AMPEU ngukuve cheni.

⁴ Kinimiye pulhapuju shompami akithe phulu cheni ikemu kumlhomiye shompami lakhikini akeu ghi qhilu chemoe.

⁵ Kughakutha alo nono mikikeu tsa piaye noye aghime sholu nani, tileno povemla nani.

⁶ Kumtsuno timi akhotomi lopu shiluni malaye pukaputsa cheni; eno sakuphumi shinikeu shompami pukha cheni.

⁷ Kumlhomiye pa thikuzumi ghi pa vehupu shitsu chemoe; pano kiu thotsu shi pukaputsa anamu paye lakhimu sasu shompami shiluni chemoe.

⁸ Khuuno alokutsu phulu keno pa likhi pa kimiye cheni; khuno vethakulu shiluni keno kighishelu nani.

⁹ Kughakutha alo akimki shepe shikemiye ghimeni putsae eno akimki tsa kipimiye puhave nani.

¹⁰ Kughuzumiye nibonilei keu kuxu xukepu kumoe, eno aquaxemiye kijemi shou ayehpe kepu kumoe.

¹¹ Nono kumsukulu shiaye oxukighide ghasulu nani. Kughono timi khamino olau pimiveni keno tipau palokutove keuno suqesuli kivi lakhike.

¹² Akukau loghuye abongushu ghugha toike ikemu pa lopu shiluaye kheakeu tsutsughu ighike toike.

¹³ Mbomzumi nu lakhino papuh shipusakepu sughi cheni. Anipu khuno akimi lomi picheni keno tiye azuno tsa tsa shi iji ake toike.

¹⁴ Timi lakhiye pa puaza launo aki ngo pisa mheghi ighiluvi ikemu AMPEU likhino kumsukulu nipu pa tsu cheni.

¹⁵ Nono akipichi shinishiaye tishi zualo ikemu noye mzuthi che nani.

¹⁶ Alhou yezahqo pechelo eno noye axushu nani, nono tipaqo kughuchove aye noye thi nani.

¹⁷ Kughou nono kumlhomi tsu jeni keno tiye AMPEU punna akeu paphike eno AMPEU no tipau olochile nani.

¹⁸ Atianuli itimi shiaphi lono eno shikalu kepushi aphi lono pa sakiyi qophelo. Nono tishimo aye pano likhi pano kutsave anipeke.

¹⁹ Ajih kumqhomi pelo shekichile makho pupelo. Nono akupuna lono pa ikhiphe aye akiniughi tishi masa kepu shi nani.

²⁰ Akukutsu tsa ini eno tipau ithinishi keu ikhilu aye noye alokutsumi shive nani.

²¹ Timino thwokha jeli kughu aghiluvi ikemu AMPEU pulou lono shini aphike.

²² Aghukha shikeuye kujomza keputsa ke; kumlhomino kimkimi nguno akiviu shiaghi cheni.

²³ AMPEU gholu aye axushu aghaqiqhiyi nani eno shikupsa launo xalu anani.

²⁴ Timi khamiye pano likhi pano kichilo achuqupu esuni keu ghi pichi acheni.

²⁵ Qhezalaki keuye ghimeqhi kepu tishianguno khunono akiviu mthakeno tipaqo pelo shikalu penike. Nono alokutsumi shi aghi aye oshikumzu keulo shikaluve nani.

²⁶ Kujomza kemi likhino papuh peithapusa cheni eno aki lono paza haphe cheni.

²⁷ Anu, opelo ithipenike shikakeu lakha aye nono ithive keu ghi payikhavino kughuchove nani.

²⁸ Khilehi thopimino kutami ghuzaniye kutope aghini keno kuchou xakutha kuhae. Kixikilamiye alhoksa michelukeu kimiye kutu cheni.

²⁹ Alikhi apulupivi kemi kughuzumiye akihepusu ithuluni putsake.