AHOLE 18 - BAIBEL (BSI)

¹ Timi khunono kutami gholo xukumtsamo keno alikhi ampi ghenguno amlo tsu anike; panonguye kumtsuno achipi kepi chekeulo kumsukuqhamo nani.

² Kughuzumi lakhiye thime ithikutolu akemokela jukuto chemoe ikemu pano shinishi chekeuye paye kishi shitsa kela ipi piye cheni.

³ Axine ngo akukujo kuma kumtsa wucheni. Ogihu chekeu puhave aye tipa alo noye jukunathakeu ithulu nani.

⁴ Timi lakhi tsaye alokutsu khuki shi aghiluvi, azukutho toike, eno aghokizu toi anileke.

⁵ Pimivekemi saphuveno pimimokemi pelo kuchou xakutha ithumlave pekeuye achipi kumoe.

⁶ Kughono kughuzumi khamino kutsala thuveni keno paye akihepusu khuanike.

⁷ Kughou kughuzumino atsa pini keno pa likhi pa shipusa ani; pa likhi pa tsa lono pa meluve cheni.

⁸ Kutami xishikeuye jumghaike, ninguno tipau munolu anishi chenike!

⁹ Akipichimi lakhiye kutsakungo chekemi lakhi toi alomo ke.

¹⁰ AMPEU ye aliwo kumto lakhi toike amikuchomino tipaulo wuluno xulu nani.

¹¹ Ikemu kinimiye aphughi lakhi puwupuakeuno qhemghai eno akumtoshi aketoi kinikuluno pano susholu nani kepi kumsu cheni.

¹² Khukhumu aqhokigheu shimoaye pa sumsa chemoe; qhezalaki kemiye shikupusa lalo cheni.

¹³ Khochile mphi lono inipaghilo. Tishimo aye noye mbomzumi eno opipunhave nani.

¹⁴ Nono kusukini shiakelo xuanishikeu kupulono oshikumto anani, ikemu nono tipau puhave aye owu lajupu ashekhau hu chevae!

¹⁵ Tsukhuyi kemiye pulhapujulo ithinishi keuno khelho eno kutope acheni.

¹⁶ Noye timi akhotomi sasu kushonishi ani kesha? Aghochhe pa lau pewu aye pai kusholuve nani.

¹⁷ Kughakutha alo timi khuuno pitughiu shini keno pa tsaye pulhapuju achipike toi, tiye pamjo akemino pa vilo iniju chilemoke kutolo likhike.

¹⁸ Kughakutha alo timi akuka kumto kuami mikinino kumjokile aye asaqhi jukeuno avehu kimchiluve cheni.

¹⁹ Othikuzuu kuphulo eno pano aphughi kumto lakhi puwupuake toi osusholu nani ikemu nono pa sasu mutomushuaye paye oghenguno akikhaluve nani.

²⁰ Nono piqhivekeu ghenguno kiu shive kepu shinikeno tipau sasu xuluve masa nani.

²¹ Nono pivekeu tsano puxuluvi momu kutsaveluvike; ike nono piqhive keu tsano kiu sughini keno tipau ikhilumasa nani.

²² Anipu phululo eno noye thime kivi phuluveake, tiye AMPEU no olau akivipu shiani kepi opiye ani.

²³ Kumlhomino atsa pini kelo aloqhaqhilei shino qhuiniju cheni ikemu kinimiye mugha chhoi khochile cheni.

²⁴ Khami sasu shompami shikeulo kushuwa wochemo ikemu shompami khamiye athikuzumi nguno alau pukhukilelu cheni.