2 Kor. 8 - BAIBEL (BSI)

Khristomi wu Tsukini

¹ Athikuzumiqo, Makedonia qhalo akukuhouqo lau Alhou wu kupukinino kiu shitsu ani keno ninguno nongu pelo ithipenishi ani.

² Panonguye akijikusa kitikhi sasu kusholue, ikeghi panongu lokiviye shishe kijeke eno panonguye kumlhomi shi anamu kupukunoshi pephetsuke.

³ Kughengu ino ashepe tsulu nani ke, panonguno aghike qhemi tsuke,panongu likhi panongu gho apulou lono aghikeu qhemi nguno alau ghi

⁴ Judia lo Alhou wu timiqo kuphunikeulo kusajelupe nikeu do kivi tsulepi panonguno ningu qhuinijuke.

⁵ Hiye ninguno laju akeu vekiye tsuke, kughengu panonguno atughushi Ampeu lau panongu likhi panongu tsuve eno tishi puzu Alhou pulou lono ningu lau ghi panongu likhi panongu ikhiphetsu anike.

⁶ Tipau kiqi lono ninguno Tito hakitekeuno pano abothu lono peitha ighiveke toi nongu gholo ghi hi kikimiye kumla hekutsukiyive tsulo pike.

⁷ Nonguye thwokhalo: akupululo, atsapilo, akighithilo, kuphunishi kutukeulo eno nonguno ningu kimiyekeulo namu akini boghi shi acheni, titoi kimiyekeu kumla hipaulo ghi nongu kini boghi shi akeu pephepiyelo.

⁸ Hiye ahza kutsu shi amoe. Ikemu kutamino kuphunishi kutu akeu nongu vilo pikeu lono nongu wu kikimiye ye kucho kepi ino ithiveniyeke.

⁹ Kughengu nonguno Ampeu Jisu Khristo kupukini ithi anike, paye akini boghi shi ake, ikeghi nongu ghenguno pa likhi pano akumlhou shive, tishianguno pa kumlho pesu nonguye akini boghi shilupeniyeke.

¹⁰ Avehu hipau ghenguno ikukumsu hipau tsu ani, wovekeu mipelo nongu paghino kiu shiphetsu eno kiu kumsuphetsu keno tipau itehiye shikupuve tsukeu pavike.

¹¹ Ikehu nonguno kiu anikeno tipau pesu puloniqhiyi kumsupu akeu shikuputsulo.

¹² Kughengu timi lakhino puloniqhiyi tsunishi aye, Alhou ye timi tipauno kuhakeu khuamo puzu pano kiu tsuluniye anikeno tipau ikhilutsu nani.

¹³ Niye kutami makho kumthuvetsu puzu nongu makho kimshivetsuniyeke kumoe,

¹⁴ ikemu kumtsu aqhemi shikepushi nonguno itodolo pofushi akeu hu kutamino avehupushi akeulo tsukepue, tishianguno kutamino pofushi kelo nongu vehupulo tsulupe kepue, tino aqhalo aqhemi shi ananike.

¹⁵ Kuchoyesulo pipuake toi: “Timi khuuno kutomo kichekutsu keno kiumu kutomo kutu aghimoe, Khuno kitila kichekutsu keno kitila kutu aghimoe.”

¹⁶ Ninguno nongu hejunishiqhiyi akeu Alhou no Tito mlolo ghi tipau supuaghi tsukehu ninguno shishe Alhou shikimthi ani.

¹⁷ Kughengu ninguno pa vilo qhuiniju kelauye paye tipau alopike likhi kumono pa ampino puloniqhiyi aghi, ikehu pa pulou lono pano nongu lau wuni cheni.

¹⁸ Tito gholo athikuzuu khuu atsakiviu pikulhakeu ghenguno akukuhouqo kumtsuno akishe tsu acheni keno tipau pelo wupenikeu shi ani.

¹⁹ Tilikhi kumono athikuzuu huye ninguno hi kimiyekini kumla shiakeulo ningu gholo kicheghuzu shipeniye akukuhouqono kishepe susuke, hipa kumlaye Ampeu jukuvupulo ninguno amlo tsuqhiyi akeu piyeni kehuke.

²⁰ Hi kumsano tsukeu gho ninguno peithatsukeulo timi khuu pelomu ni pulupusa pemonike kutokupuyi anike.

²¹ Kughengu ningu kimijiye, Alhou zulo likhi kumono timi zulo ghi kiuno achipiu keno tipau shinikeu shi ani.

²² Panongu gholo nithikuzuu lakhi puwu ani; ninguno aghuloki jeli kutomo lono pa peithajuveake paye kiu kiulo namu hejunikeulo amlo tsuqhiyikeu ani, eno paye nongu shou pulubekeu kije ani kehu hejunishi qhiyi anike.

²³ Tito ye nongu ghenguno isasu kuloji kumtsa mla kuqhachekemi ke; eno athikuzumi kutamiqoye Khristo jukuvupu ghenguno akukuhouqono kishepuwukemiqo ke.

²⁴ Ikehu panoqo lau nongu kimiyekini eno nino nongu jupe akijivilo chekeu mutsuqheyi shipiyelo, tishianguno akukuhou kumtsuno tipau ithipenike.