2 Kor. 6 - BAIBEL (BSI)

Kushokutsu Laghi

¹ Pa gholo mlakuqhakemi kehu ninguno nongu qhuyiniju kithe akeuno: Alhou kupukini ikhilu keu hu adou shivetsu kevilo.

² Kughengu Alhou no ishi pike: “Ino qhuivukepu ghulokilo niye nongu sutsa initsuke, Xakulupu tsalalo ino nongu kuphuke.” Julo! Alhou wu qhuivulakeu ikhilu nikeu ghulokiye hike, xakulupu tsalaye itehino ke!

³ Timi khuu laghi lomu ninguye lakukha qhitsu puamoe, ikehu khuu pelomu ni kumla kughuthalo akipimi phulu pemo nanike.

⁴ Tishinike zuqhulo, ninguye Alhou qemiqo kehu alaghi thwokhalo ningu likhi ningu jukutokughoyi acheni; tiye akupuna puqhepekeulo eno akijikusalo kheakulushi cheni.

⁵ Ni ghaqhikeulo, akughu shikelo, muto mughu ipeghive kelo, ghichhe ghimelo, ngopemo mithe keulo eno chumo shomokelo kheakulushi acheni.

⁶ Tiye ni mikucho, akighithi, kutuukulu eno kimiyekini akeu pesu; Aghungu Kimthe, kuchou kikimiye,

⁷ kuchou tsape shikeu, eno Alhou kuka ishi akeu lono ninguye Alhou qemi kepi xupiye acheni. Ghiha eno susho kepushi ninguye amikucho zutakihi ani.

⁸ Ningu sunheqhe cheni eno haqhi cheni; ningu thaigha cheni eno sheqhe cheni; kimkimi toi ningu peitha cheni, ikeghi ninguye kuchou picheni;

⁹ timino mthakemi toi, ikeghi kumtsuno ni ithi acheni; kithimi toi ikeghi ninguye xu acheni; akijipusa ketoi anamu ningu pithivemoe;

¹⁰ amlo ghimepu shitsu anamu ninguye pulhapuju alovi acheni; kumlhomi toi anamu timi kutomo pelo kinimi shilupe acheni; kuha ketoi anamu ninguye thwokha aghi cheni.

¹¹ O Korinthiamiqo! ninguye nongu lau ni kichi xukho pesu pi ani, ni mloye khaqhipesu anike.

¹² Ninguye nongu hakha amoe ikemu nongu dolo letha kile keu anie.

¹³ Niye apuno atianuliqo vilo piake toi pianike, itehiye ningu toi nongu ghi nilau kumsu kilelukeu alo. Kumsukulu aghi nongu mlo ghi xukholo.

Xuakeu Lhou Achine ki

¹⁴ Pulumokemi sasu aphiphishi kimepesu mla kuqha kevilo kughengu kishi puzu achipiu ngo akumou kuma kulojiluni kya? Kishi puzu akuvu ngo akuzu kuma kuposhuluni kya?

¹⁵ Khristo ngo Tughami pama kuqhakulupu kesha? Kupulumi lakhiye pulumokemi lakhi sasu kiu aqu shiakepu ani kya?

¹⁶ Alhou chineki ngo asu-atu ajulho pama kiu lono pulokile kepu ani kya? Kughengu ninguye xuakeu Lhou chineki ke, Alhou no ishi piveke toi: “Ino panoqo lolo xuni eno panoqo gholo acheuveni; Ino panoqo Lhou shini eno panonguye iwu timi shiveni.”

¹⁷ Ikehu Ampeu no pi: “Nonguye panoqo gholono ipeghivelo eno panongu launo kututa shivelo. Mithekumo kiukeno bukevilo, eno ino nongu ikhilu nani,

¹⁸ eno ino nongu paPuh shive nani, nonguno inuliqo eno ingaqo shive nani, ipi Akughushu Mipeu no pike.”