2 Kor. 5 - BAIBEL (BSI)

¹ Kughengu ninguno ithi akeuno ayeghilo nino achekeu niphimpi hipau aphiki toi shipusave aye, ningu pelo alhokupuju ngo kepu ghenguno Alhou ampino kungughalo auno shimokeu ki lakhi kutope puani.

² Eno kungughalo nikungoki akeulo avenishi kelauno itehi ninguye amlo ghuju ghugha shi acheni;

³ kughengu ninguno tipau pepuluve aye aphi kumsa akeu ithulupemo nani.

⁴ Ningu phimpi phikilo ake thaqhu loye kutakihi kelauno amlo ghuju shi acheni. Ike ninguye ayeghilo phimpi pheve nishike ghenguno kumoe ikemu ninguye kungughalo phimpi pepunishiye ke, tishianguno thiveni kuau huye akuxupuno munove peniye ke.

⁵ Hipau thime ghenguno Alhou no ningu pesu kutokupuyipe ani, eno pano ningu ghenguno puakeu Ghungu kihikuthado ghenguno tsuvae.

⁶ Tishikehu ninguye pulhapuju amlo kuloghino chhitoi acheni. Ninguno ithi akeuno ni phimpi hipau ake tiviloye Ampeu ki launo putosu ani,

⁷ kughengu ninguye agi zulo aghikeu kumono akupulu lono checheni.

⁸ Ninguye amlo kuloghi shi ani, kughengu aphimpi qhiveno Ampeu kilo acheuve nikeu pavike.

⁹ Ike thwokha kumtsu nguno alauno,khile khilepimu pa pulou shitsu anikeu eno pa gholo anikeuno ni kimijike.

¹⁰ Kughengu ningu kumtsu athono Khristo kughakutha zulo puthugho masa nani eno pututano kiu mla puani keno kivi kusa kiqi lono ithulupe nani.

Khristo lono Kuposhukulu

¹¹ Ampeu sukumsaye kiu keno ninguno ithi ani kehu nino timiqo hakite acheni. Ninguye kiutoi kemi keno Alhou no ithi ani, ino laju akeuno nongu ghi ni ithi aghi nanike.

¹² Ninguye nilikhi ni sheqhe anike kumoe ikemu nongu pelo ni ghenguno akijivilo kepu akiqi kivi nongu tsu anike, tishianguno nongu pelo khunoqono timi ghushoghili jumo puzu aju-akoghe jupesu aqhekuza shi cheni keno tipaqo khochilelu peniyeke.

¹³ Ninguno kughuzumi ghola shive aghiaye tiye Alhou ghenguno ke ikemu ningu kukumsu achipilo aghi aye, tiye nongu ghenguno ke.

¹⁴ Kughengu Khristo kikimiyeno ningu bothape ani kehu ninguno ithitoi akeuno milakhino kumtsu ghenguno thive ike tipau kiqiye timi kumtsu pa gholono thikuqhavae.

¹⁵ Pano timi kumtsu ghenguno thive kehu khunoqomi xulu keno tipaqoye pututa kuxu xupemoniyeke, ikemu panongu ghenguno thiveno xuputhuvekeu timi lakhi ghenguno xupeniyeke.

¹⁶ Tighenguno ninguye timi kuxu ghola qhemi pesu khuu shou mu xatha chemoe. Ghuthu lakhiye ninguno timi kuxu ghola qhemi pesu Khristo shou xathaju che kemu itehiye khilemu tishimovae.

¹⁷ Tighenguno timi khuu khumu Khristo gholo xukimeluve aye paye lhoxu kithe lakhi shivae, aqau woveno akitheu ighivae.

¹⁸ Hipaqo kumtsu Alhou launo ke, pano alashilupeke eno kutami pelo pa sasu alashilu penikeu kumlapu saje ningu tsuke.

¹⁹ Ike tiye, Alhou no Khristo gholono ayeghilomi sasu kulashilu ake; Alhou ye timi xine kichekumqo pe panongu shou qhitsumo puzu kulashilu keu tsape pesu ningu pichebetsuke.

²⁰ Ikehu ninguye Khristo ghenguno lashikami ke, Alhou no ningu vechewo pa ampino nongu piputo akeu kumlhoke. Khristo she amuzu shighi ninguno nongu qhuiniju anike, Alhou lau alashiluvelo!

²¹ Khristo ye axine kuhae, ikemu Alhou no pa pesu axine kughulhovetsu, tishianguno pa gholo kuqhape akeu lono ninguye Alhou mikucho kusajelupeniye ke.