2 Kor. 4 - BAIBEL (BSI)

Aghungulo Kinikhuki

¹ Alhou kukupu vechewo akumlapu saje hipau ningu tsukehu ninguye amlo hauve chemoe.

² Ninguye tuqhotugho kumla eno akukujopu kumla jeli kumtsu qhikhavae; ninguye muqumugha shi chemoe momu Alhou tsa suchighi chemoe, ikemu kuchou ghili pepheghi ninguye Alhou zulo xuacheni eno timi kumtsu kivikusa lokutsu zulo ninguno xu cheni.

³ Kughengu atsakiviu hu kusuluve namu tiye khunoqomi puhaveno ani keno tipaqo lau likhino kusuluve ake.

⁴ Panongu ghenguye hipau yeghilo tughakusano akukumsu sakughuzuve tsuke, tishianguno panongu pelo Alhou ngulho kimihiu Khristo kimthe jukuvu ghili atsakiviu launo akuvu ighichekeulo jupukulu pemoniyeke.

⁵ Kughengu ninguye nilikhi ni suqhekeu sheshu chemoe; ninguno Jisu Khristo ye Ampeu ke eno ninguye Jisu je ghenguno nongu qemi kepi asheshu cheni.

⁶ Ike, “Akuvuno akuzu lono vuipeghi pelo!” ipikeu Lhou no ni mlolo pa kuvu yepuvutsu puzu Alhou kimthe jukuvu kighithi kuvu Khristo gilo yevuqayi akeu ningu lau saghitsuniyeke.

⁷ Ikemu ningu hipau ngu agha kinikhuki akemiqoye ayeghili toi akemiqo ke, tiye akuka akiqheu ye Alhou wu kethono ningu wu kumokepi piyeniye ke.

⁸ Alaghi thwokha lono ningu tsadaqhike ikemu munuqhivemoe, ninguye amlo itamujuyike ikemu amlo hauvemoe;

⁹ ningu shikighimeqhike ikemu Alhou ye ningu phevemoe; eno ningu hekuluqhike ikemu pithivemoe.

¹⁰ Pulhapuju niphimpilo Jisu kithi pepu acheni tishianguno Jisu kuxu ghi niphimpi lono ithulupe niyeke.

¹¹ Jisu je ghenguno nikuxu kupuju akithipulo ikhiphetsu acheni tishianguno niphimpi hipaulo pa kuxu ithulupe niyeke.

¹² Tishiaye akithino nishou mla itha ani, ikemu akuxupuye nongu shou mlaitha anike.

¹³ Kuchoyesuno, “Ino pululuve ke ghenguno ino pivae” ninguye akupulu ngugha anike ghenguno pulu ani kehu pi ani.

¹⁴ Ninguno ithi akeuno Alhou no Ampeu Jisu xuputhu kehu pano Jisu gholono ningu ghi xuputhu nani, eno ningu kumtsa pa zulo saghi nani.

¹⁵ Hipaqo kumtsu nongu ghenguno ke tishianguno Alhou kupukinino timi lau alau ikowo keshi, Alhou kimthe jukuvupu ghenguno panonguno shikimthikeu alau tsuape niyeke.

Akupulu lono Xuani

¹⁶ Highenguno ninguye khilemu amlo hauve chemoe. Ni phiashiye tsu-ma ayeakemu, ni loloye tsalakipetsu akithe shikithevetsu ani.

¹⁷ Ninguno ghicheghime dolo ikhonhei sholu akeu huye kiunomu pe kimghimlakeu lhokta kimthe jukuvu lakhi saghitsu nani.

¹⁸ Kughengu ninguye ithukulu thime shou nimlo tsuqhiyi ithu chemo ikemu ithu kumla thime shou nimlo tsuqhiyi acheni. Ithukulu thimeqoye ado ikhonhei ghengu likhi acheni ikemu ithukumla thimeqoye alhokupuju ghengunoke.