2 Kor. 2 - BAIBEL (BSI)

¹ Ikehu ino kumsuluve keuno, niye itaghi nongu lau ighi puzu khuno nongu mlokusapu shitsuamoe.

² Kughengu ino nongu mlokusapu shitsu kepushive aye iloshipivitsuni kemi khuu ani kya? Ino amlo kusapu shivetsukemiqo likhino ke!

³ Tishikehu nongu lau yesu hu yeveke, tishianguno kughou ino ighikeno, ilokivi shitsu kepushi akemiqo launo imlo kusapu shilunosake. Kughengu ino nongu tsaquyi ithi akeu vechewo pilu akeuno kughono ino alokivishi ani keno nongu ghi alokivishi cheni.

⁴ Kughengu nongu mlo kusapu shitsumo puzu nongu pelo niye shishe nongu kimiye ani kepi ithipeni kelauno niye amlo ghime kije eno amlo ghuju eno kumzapu anhezu pijikeu lono nongu lau yesu yepuwuke.

Akipimi Pevetsukeu

⁵ Ikelo timi khuuno kutami mlo kusapu shitsu ani keno paye ishou shipuku anike kumoe alau pimoniye kethono nongu kumtsu shou shipuku anike.

⁶ Nongu gholo kutomono timi tipau shou aghime hitoi shikeu huye lumkhaveake.

⁷ Ike nonguno itehiye pa kipimi pevetsu kepu eno pa lokughuno tsulo, tishimoaye paye amlo kusano ihulove puzu kiumu shimlave nosake.

⁸ Ino nongu qhuiniju ani, nonguye kuchouno pa kimiye akeu pa pelo mutsuqheyi ithilupelo.

⁹ Hipau kiqi ghenguno nonguye thwokhalo aghokulu shinani kemokeno nongu peqheju eno nongu juniaye ino nongu lau yesu yepuwuke.

¹⁰ Nonguno timi khuu kipimi pevetsu nikeno nighi pa kipimi pevetsu ani. Ino kiu kipimi pevetsu nikeno, ino akipimi pevetsu puaghiaye, ino tishikeu huye Khristo zulono nongu ghenguno ke.

¹¹ Tishikeu huye Satan pelo ningu shou alau heqabelu pemonike; kughengu pano ningu shou amqu jeli shichekeu mthake kumoe.

Troa lo Paul ye Kutakihive

¹² Kughou ino Troa lo Khristo tsakiviu pesu asheshuniye ighikeno, Ampeu no ighenguno tilehi mlalupe nike alaghi khaqhitsu.

¹³ Ikemu tilehi ningu thikuzuu Tito ithumlave kehu niye shishe imlo kupunave puzu Makedonia lo wuve.

Khristo vechewo Theqhikulu

¹⁴ Ikemu Alhou lau shikimthikeu alo! Kughengu Khristo gholo kimepe akeu lono, Khristo no aghutolu keulo akughumi shekujo chekeu toi Alhou no pulhapuju ningu sacheni, eno Alhou no ningu peitha puzu axokutsungu toi timi kumtsu vilo Khristo ithilupe nikeu vekupha cheni.

¹⁵ Kughengu ninguye khunoqo xaluve akeno tipaqo gholo eno khunoqo puhaveno ani keno tipaqo gholo Khristo no Alhou lau axokutsungu- ta pesu tsungquyi shikeu toi ke.

¹⁶ Khunoqomi puhaveno anikeno hiye pithive nikeu xokutsungu lakhi ke; khunoqomi xaluveakeno hiye akuxupu saghitsu keu xokutsungu lakhike. Khuno hipaqo thime shikulupu kupukulayi ani kya?

¹⁷ Ninguye kutami kutomono ame mulaleyikeu lhidi nhemgha peitha ake toi Alhou tsa peithakemiqo kumoe; ikemu Alhou no ningu puwukeu ghenguno, ninguye kuchou picheni, Alhou zulo Khristo qemi kehu ninguno picheni.