2 Kor. 1 - BAIBEL (BSI)

¹ Alhou pulou vechewo Jisu Khristo wu apostolmi shiluve keu Paul, eno ningu thikuzuu Timothi pamano Korinthia lo Alhou kukuhou akemi eno Akhaya qhalo Alhou timiqo kumtsu lau ye ani:

² Ningu paPuh Alhou eno Ampeu Jisu Khristo kudauno kupukini ngo alokiqipu nongu shou apeniu.

Aghimelo Alhou Shikimthi

³ Ningu Mipeu Jisu Khristo paPuh Alhou, kimiyekiniu Apu eno alokughunopu kumtsu tsuchekeu Lhou lau ninguno sheqhe ani.

⁴ Pano ninguno shilukusa sholukeu kumtsulo ni-lokughunotsu cheni, tishikehu ninguye Alhou launo alokughuno ithuluvekeu hu peitha puzu timi khunono shilukusalo aghini keno ninguno tipanoqo lokughuno tsulu cheni.

⁵ Ike ninguno Khristo ghichhe ghime kusajeke hutoi Khristo vechewo alokughuno tsukeu ghi ninguno kusaje cheni.

⁶ Ninguno shilukusa sholu aye tiye nongu lokughunotsu eno nongu xakulupu ghengunoke, ninguno alokughuno sholu aye, nongu lokughuno tsunike ghenguno ghike, tiye nonguno nino shilusa akeu paphi shi shilukusa nonguno sholu kelo kutuuno theqhi khelukeu lono ithi peniyeke.

⁷ Ikehu nongu shou ninguno lajuakeuye ithamono mutotoi ani, kughengu ninguno ithi akeuno nonguno ni shilukusa kusaje kehu toi, ni lokughuno ghi nonguno kusaje nani.

⁸ Kughengu ninguno Asia yeghi bocholo shilukusa sholukeu nongu pelo mthano apenishi moe. Shishe puqhekumla pushi ningu munudaqhi kelauye ninguye akuxu ghi pulumoveke.

⁹ Kuchouno akithipu pesu ningu shou betsuani kughashi kumsuve, tishikeu lono nilikhi ni pukhu pemono Alhou shou pukhu peniyeke, pano kithimi xuputhu chenike.

¹⁰ Pano akumsa kuyighupu lono ningu xapheluke, eno ningu xaphelu nani; eno ningu lajupu pa shou bepe anike pano itaghi ningu xaphelu anani.

¹¹ Nongu ghi akighini pesu ningu kuphu alo, tishianguno ningu ghenguno akighini kumzapu shitsuakeu hu khochiletsu peni, eno Alhou no ningu kumghatsu nani eno timi kutomono ningu ghenguno shikimthikeu Alhou tsupenike.

Paul Kukughu Kilive

¹² Ningu kijivilo chekeuye hike; nilolo kivikusa lokumsuno ashepe nitsu akeuno ayeghi hipaulo nikuxuye Alhou launo ighikeu kimthe eno musumulai xuchekeu ayeghilo suqekighithi lono kumoe ikemu Alhou wu kupukini pesu xucheke, eno tiye akhotono nongu lau tishi kutshupe xucheke.

¹³ Kughengu ninguye nonguno kiu philu eno kiu ithikutolu nani keno tipau likhi yepuwu ani.

¹⁴ Nonguye ithi kuthu mphike, ikemu ino pulu akeuno nonguye Ampeu Jisu Tsala lono kupukulayi ithikutolu nani, ike ninguno nongu shou akijivilo cheketoi nongu ghi nishou akijivilo nani.

¹⁵ Niye hipaulo mutsuqheyi akehu, atughushi ino nongu lau ighi paghi nikeu shi pughupe ake, tishianguno ghuthu kini nongu kumghatsunike.

¹⁶ Kughengu ino Makedonia lo wuchekelau ghi eno tilauno idewoche kelaughi nongu sasu kushonike pughu ani, tileno ino Judia lo izuwu chekelo nongu pelo ighuzulalo kuphupuwu penishi anike.

¹⁷ Ino hitoi kughukeulo niye lhelheyi ani kughashi kesha? Ino akukughu shikelo niye aghukha vesukeu lono shipuzu qhayikhavino “Iye” “Moe” ipikeu pi ani kughashi kesha?

¹⁸ Alhou ye pukhubekulu kehu ninguye nongu vilo “Iye” “Moe” ipikeu tsa piqhimoe.

¹⁹ Kughengu Alhou Nu Jisu Khristo pesu nongu gholo Sila, Timothi eno isheshu huye “Iye” “Moe” ipikeu tsa kumoe, ikemu Alhou no “Iye” ipikeuye pake.

²⁰ Kughengu Alhou no piqhipuakeu kumtsu pa gholono “Iye” ipikeu anike. Tighenguno pa vechewono Alhou jekipipu shinike ninguno “Amen” ipi cheni.

²¹ Ikemu Khristo lono ningu pelo nongu shikumtolu apekeu huye Alhou no ke; Alhou no ningu kophepe qhi,

²² eno pawke pikeu michipu ningu shou amchi shivetsu eno ningu ghenguno pano kiu puani keno tipau tsutha puaghi keu shi ningu mlolo Aghungu Kimthe tsuvae.

²³ Alhou no isaphu tsupenike ku ani ike ino Korinthia lo itaghi ighimono akeuye nongu loshipusu tsumoniyeke.

²⁴ Nonguye kiu pulu masa keno ninguno nongu vilo mijetsu akepu kumoe, ikemu nongu lokivipushi ninguye nongu sasu mla itha chenike, kughengu nonguye akupululo mutotoi puthugholu anike.