1 Kor. 7 - BAIBEL (BSI)

Kulakupu vehu Inijukeu

¹ Itehiye nonguno khipaqo vehu ilau yepuwu keno tipaqo juni. Kiptimi lakhiye totimi sasu ashi-aji kuqhamokeu pavike.

² Ikemu kipti toti dolo mithemokeu shishe ighukepu shi anike ghenguno timi kumtsuno pututa nipu akepu eno totimi kumtsuno pututa kimi akepue.

³ Akimino pa nipu lau akimi kumlapusaje shikuputsu kepu eno anipuno likimi lau anipu kumlapu saje shikuputsu kepu eno lakhino lakhi vehupushi akeu ghapiqitsu kepue.

⁴ Anipuye li phimpi shou ampeu kumoe, ikemu akimino ke, tihutoi akimiye pa phimpi shou ampeu kumoe, ikemu anipuno ke.

⁵ Nonguno ado peveno kumvu akighini shiniye kihikuthado ghenguno kushomonikeu shi kumtsa pulo kuqha puaghinike kumoaye akimi anipu dolo milikilekeu shikevilo, ikemu itaghi kumtsa ngoluvelo, tishi anguno nonguno alikhi aghasu mlavekeulo Satan no ghujukeulo ilove pemonike.

⁶ Ino hipaqo piakeuye ahza lakhi shiamoe, ikemu pulosutsukeu tsa kethono.

⁷ Ino mutsuqheyino pinikeuye timi kumtsu pelono ni ampiye kishi ani keno titoi shi penishi ani. Ikemu pututa shelo Alhou launo agho kimchi ithulukeu ani, milakhiye agho hipau eno kutami lakhiuye agho kutau ishi ithulu puakhani.

⁸ Kulakupu shimono akeqo vilo ngo chimemiqo vilo ino hi piani: Nongu ghenguye ni ampi toi luthu shi achekeuno akiviuke.

⁹ Ikemu nonguno ashi-aji ghasumla kepushi aye nonguye kulakupu shivelo. Kughengu ghasumlano pitipuzaqhi apenikepu zuqhuye kulakupu shive keuno akiviuke.

¹⁰ Kulakupu shivekemiqo ghenguno ino ahza hipau tsu ani, ino kekumoe ikemu Ampeu launo ighikeu: ike anipuye li kimi sasu ixa kepu kumoe;

¹¹ lino tipau shiaye, liye luthu shi acheuve masa moaye li kimi sasu kulashipesu kumtsa auve masa; eno akimiye pa nipu kughuxa kepu kumoe.

¹² Kutamiqo vilo ino hi piani, (hiye ino kethono Ampeu no pikeu tsa kumoe): Tsala Khristomi kiptimi lakhino pa nipu akupulukumomi lupuaghini, ikelo lino pa sasu kughuna anikeu pulo aghiaye paye li sasu ixave kepu kumoe.

¹³ Eno Khristomi totimi lakhino likimi akupulukumomi kilo wopuaghini, ikelo pano li sasu kughuna anikeu pulo aghiaye liye pa sasu ixave kepu kumoe.

¹⁴ Kughengu kupulukumou akimi huye pa nipu vechewo Alhou lau akimtheshi ikhilukepu shilu nani, eno kupulukumou anipu huye likimi Khristomi vechewo Alhou lau akimtheshi ikhilukepu shilu nani. Tishimo aye nongu tianuliqoye Khristo kumomi paphi shiniae; ikemu itehi panonguye Alhou lau akimtheshi ikhilukepu shi anike.

¹⁵ Tishianamu, akupulukumou shiakeu huno Khristomi akimi momu Khristomi anipu phevenishi aye, tishive pelo. Tikithipu shive keloye Khristomi akimi na anipu pinamu tsughape qhimovae; kughengu Alhou ye alokiqishi xupeniaye nongu kuluvae.

¹⁶ Nono kupulumi anipu lakhi shiaghi aye noye okimi xamla nani kepi kishieno piluni kya? Momu nono kupulumi akimi lakhi shiaghi aye noye onipu xamla nani kepi kishieno piluni kya?

Alhou Pulou lono Xulo

¹⁷ Tishiepimu, pututano Ampeu no kumsagho pa tsu keu kiqi lono pa kuxu xulo eno Alhou no kiulo pa kuluve akeno tipaulo xulo. Niye hipau pesu akukuhou kumtsulo pepimhekeu-yeh shi acheni.

¹⁸ Achineyeh kiqilono aphighu yiko ghavekemi lakhi Alhou no pa kuluve akesha? Paye achineyeh kiqilono ayiko ghavekeu michi hu shipuhave nikeu shikevilo; Achineyeh kiqi lono aphighu yiko ghamokemi lakhi Alhou no pa kuluve akesha? Paye achineyeh kiqi lono aphighu yiko ghanikeu phuakevilo.

¹⁹ Achineyeh kiqi lono aphighu yiko ghakeu na ghamokeu pinamu kiumu kumoe, ikemu Alhou no ahza tsu keu pelukeuno akhotoke.

²⁰ Alhou no timi lakhi kulukelo paye puzuu kiu qhemilo achekeno tipaulo akepue.

²¹ Alhou no okulukelo noye aqemi shiache kesha? Omlo ghimepu kuhae; ikemu okhaqhipheve kepudo sholuaye tipau dokivi peithalulo.

²² Kughengu aqemi khuu Ampeu no kuluve akeno paye Ampeu no khaqhipheve kemi ake; tihutoi timi khuu pa kulu kelo paye khaqhiphevekemi shiakeno itehiye Khristo qemi ake.

²³ Nonguye ameno qhuvae, tighenguno timi qemi shiwuve kevilo.

²⁴ Ikehu, athikuzumiqo, pututano kiulo akelono kulu puaghi pinamu tipaulo Alhou sasu kuposhu achelo.

Kulamokemi eno Chimemi

²⁵ Itehiye kulamokemi vilo hi pitsuni: Ampeu launo tsukeu yezah niye kuhae ikemu Ampeu wu kikimiye vechewo niye pukhubekulumi lakhi shighi ikukumsu lakhi tsu ani.

²⁶ Itodolo sukuchoqhi akeu jukelo ikukumsuye timi lakhi ghenguno paye itehi kishi anikeno titoi aghikeu pavie.

²⁷ Nono anipu luve aghiaye li launo kututa shikevilo; eno nono kulamono aghiaye anipu phukevino aghilo.

²⁸ Ikemu, nono kulakupu shiaye noye axine shianike kumoe; eno totimi lakhino kulakupu shiaye liye axine shianike kumoe. Ikemu khuno kulawuni keno ayeghiqha hipaulo ghichhe ghime sholu chekeu sholu nani, eno niye tipau launo nongu hakhaniyeke.

²⁹ Athikuzumiqo, ino piakeuye hike: aghulokiye ikhonheyivae; hinguno hilauye kulakupu shivekemino panonguye kulamphi kehutoi xumasa,

³⁰ eno mlo-qakemino mlo-qamo kehutoi xumasa; eno alokivishi akemiqono alovimono akehu toi xumasa; eno kuqhukilimino panonguye kiumu pighimo ketoi xumasa:

³¹ eno khunoqono ayeghiqha peitha anikeno ti peithamono akeshi xumasae. Kughengu ayeghiqha hipau koghekughu kumtsu wokhave ani.

³² Niye nongu pelo kumsukimgheyi apenishi moe. Kulamo kemiye kishi puzu Ampeu pulou shiluni kelapi Ampeu kumlapu sajelo kumsukimgheyi acheni;

³³ ikemu kulawuvekemiye ayeghiqhalo kumlapu saje ghenguno kumsukimgheyi acheni, kughengu paye pa nipu pulou shitsunishi,

³⁴ ikehu pa kukumsu supho-kijeve ani. Kulamokemi totimi lakhiye eno ililhotheye Ampeu kumlapu saje ghenguno kumsukimgheyikeu acheni, kughengu aphi-mpi ngo angugha pesu Alhou lau akimthe shianishike; ikemu kulavekemi totimiye ayeghiqhalo kumlapu saje ghenguno kumsukimgheyi pesu acheni, kughengu liye likimi pulou shitsunishike.

³⁵ Ino hi piakeuye nongu kuphulupeniyeke. Niye nongu lakhape qhive niyeke kumoe, ikemu nongu pelo aghola kiviulo alupe eno nongu pelo supho sughomono Ampeu huthulu peniyeke.

³⁶ Timi khuuno pano luakeu ayiliu lau ashi aji ghasumla keu lono aghili kusa shiayeapi kumsulu keno pano pulokehu toi, pa pelo kulakupu shive pelo, tiye axine shiamoke.

³⁷ Ikemu timi khuuno pa mlolo mtotoi shive eno kiunomu pa vilo tishimasaputsake ipi keu ghenguno mu kumoe ikemu pa shi aji ghasulu aghi puzu pa mlolo kulawumonikeu shi xathaluve aye paye pano luakeu ayiliu lumokeuno akiviu ke.

³⁸ Ike khuno timi tipauno luchekeu ayiliu lunikeno achipike, eno khuno kulakupu shimokeno tiuno akiviu ishike.

³⁹ Anipu lakhiye li kimino xuake kutolo pa sasu tsughakimepe anie; ikemu akimi thive aye liye lino khuu sasu pulo keno tipau sasu kulawulu nani, ikemu tiye Khristomi kulakupu ghola kiqilo likhino shimasae.

⁴⁰ Liye lino kishi akeno titoi auvekeuno li ghenguno alokivipuke. Tiye ikukumsu tsuanike, eno ino kumsulu akeuno Alhou Ghungu no isasu anike.