1 Kor. 2 - BAIBEL (BSI)

Khristo Kros Ghili Asheshu

¹ Athikuzumiqo, kughou ino nongu lau ighikeno, niye atsa pikithi momu asuqe kighithi lono Alhou wu mzamughaleyi keu kuchou pikulha ighike kumoe.

² Kughengu niye nongu gholo akeloye Jisu Khristo eno pano kros lo thivekeu nguno kutauye kiumu ithipe nishimokeu ino xathaluvae.

³ Ino nongu gholo akelo niye tomo-chhimokeu, msa-ighukeu eno khokhoshi ae;

⁴ eno itsapi ngo ino asheshukeulo zukide kudakeu tsa eno timi suqekighithi peithamoe, ikemu Alhou Ghungu kuka shipe piyekeu ino peithake.

⁵ Ike nongu kupuluye timi suqekighithi shou bepemono Alhou kuka shou bepeni kehuke.

Alhou Suqekighithi

⁶ Tishimu akupululo tekhoyive kemiqo viloye asuqe kighithi tsa pesu picheni; ikemu tiye hipa yeghilo suqekighithi momu hipa yeghilo ayehkipemi kuka kumoe, tipaqo kukaye hauvenikeu kuka ke.

⁷ Ino piakeu suqekighithiye Alhou tuqhou suqekighithike, tiye timi launo kusupe puachekeu ke, ayeghiqha lhomphi lono Alhou no ningu kimthe jukuvupu shitsunike kughuqhikeuke.

⁸ Hipa yeghilo ayehkipemi lakhinomu hipau suqekighithi mthake. Panonguno hipau ithi ke aye panonguye akimthe jekipi Mipeu kros lo yedapithi moni cheke.

⁹ Ikemu kuchoyesulo ishi yepuani, “Timi khunomu ithumla aphikeu, momu chimla aphikeu thime, momu timi mlolo kumsuphemla aphikeu thime, khunoqono Alhou kimiyecheni keno tipanoqo ghenguno Alhou no kutope puani.”

¹⁰ Ikemu Alhou no pa Ghungu vechewo thime hipaqo ningu lau pephepiyevae. Aghungu no thwokha lhekide kudaju cheni, Alhou kukughu thonheyi kusupuakeu kutolo.

¹¹ Kughengu timi lakhiye, pa nguagha pa lou akeu likhino pa lhoaye ghili ithitoi cheni, tihutoi Alhou Ghungu likhino Alhou lhoaye kumtsu ithi anike.

¹² Ninguye hipa yeghilo ngu-agha ithuluke kumoe, ikemu Alhou launo puwukeu Ghungu ithuluke, tishianguno Alhou no kumghagho tsukeu kumtsu ningu pelo ithipeni yeke.

¹³ Ikehu ninguye timi suqekighithino shikakeu tsaqo pesu pichemoe, ikemu Aghungu Kimthe no shikakeu tsaqo pesu picheni, kuchou nguagha ghili pesu Aghungu ghokulumiqo kimghipiye cheni.

¹⁴ Ikemu Aghungu Kimthe sumono xuchekemiye Alhou Ghungu launo kumghagho ighilu chemoe. Pa ghenguno tipaqoye mbomzuke eno paye tipaqo ithikuthumlae, kughengu Aghungu likhino tipaqoye amekuapu kiu keno kiqiphelu cheni.

¹⁵ Aghungu Kimthe no sasu xuchekemiye ajeli kumtsulo amekuapu kiukeno kiqiphelu keu acheni, ikemu kutami khunomu pano amekuapu akeu kiqiphelumlae.

¹⁶ Kuchoyesulo ishi yepuakeu toi, “Kughengu khuuno Ampeu kukumsu ithi ani keno pa vilo akukumsu tsukile kulupu kya?” Ikemu ninguye Khristo kukumsu pesu achekemike.