1 John 5 - BAIBEL (BSI)

Ayeghi shou Tokulu

¹ Khunono Jisu ye Mesiya kepi pulube cheni keno paye Alhou nulike; eno khunono apu aza kimiye cheni keno ati anuli ghi kimiye cheni.

² Kughengu ninguno Alhou kimiye eno pano ahza tsukeu pelu nikeno ninguye Alhou tianuliqo kimiye cheni kepi nino ithi cheni.

³ Kughengu ninguno Alhou kimiye cheni ipikeu kiqiye pano ahza tsukeu ninguno pelu chenike. Pano ahza tsukeqoye puqhekumlapu kumoe,

⁴ kughengu Alhou tianuli shiluvekemiye ayeghi theqhilu cheni. Ningu kupulu pesu ayeghi shou theqhilu cheni.

⁵ Khunono ayeghi shou theqhilu cheni kya? Jisu ye Alhou Nu kepi pulube chekemino ayeghi shou theqhilu cheni.

Jisu Khristo Shepe

⁶ Jisu Khristo ye azu ngo ahji lono ighikeuke, azulo likhino kumoe ikemu azu ngo ahji kini kujo lono ke. Hiye Aghungu no kuchou kepi ashepe shiani, kughengu Aghungu ye kuchouke.

⁷ Ashepe kishi kuthu acheni:

⁸ Aghungu, Azu eno Ahji eno hipano kuthukujo ashepe shikuqha cheni.

⁹ Ninguno timi shepe pulube cheni, ikemu Alhou no ashepe shitsukeuno akijeuke, eno pano pa Nu ghili ashepe hipau tsupuani.

¹⁰ Ikemu khuno Alhou Nu shou pulubeni keno pa mlolo hipau shepe acheni; ikemu khunono Alhou shou pulubemo nikeno pa pesu akimkiu shivetsu cheni, kughengu Alhou no pa Nu ghili pikeulo pulubemo kehue.

¹¹ Ashepe shipuakeu huye hike: Alhou no lhokta kuxu ningu tsuvae eno akuxu hipauye pa Nu launo ani.

¹² Khuno lolo Anu ani keno akuxu ani; khuno lolo Anu kuhakeno akuxu kuhae.

Lhokta Kuxu

¹³ Nongu Alhou Nu pulu kemi lau ino hipau yelu ani, tishianguno nonguye lhokta kuxu anikepi ithipe niyeke.

¹⁴ Ninguye Alhou zulo amlo kuloghi shikulupu ani, kughengu ninguno pa pulou kiqi lono kiukiumu khuaye Alhou no tipau chilutsu cheni.

¹⁵ Tsala ninguno pa vilo khukelo pano chilutsu cheni kepi ninguno ithitoi ani aye pa vilo kiukiumu khukelo pano ningu tsu cheni.

¹⁶ Nongu gholo khualano pa thikuzumi lakhino thimokepu xine shiaghikeu ithulu aye, nono Alhou vilo khulo, eno khunoqo xineno akithipu kumokeno Alhou no akuxupu pesu pa tsu nani. Akithipu xine acheni, eno niye nongu vilo tipau ghenguno Alhou vilo inikhu lopi piamoe.

¹⁷ Alhoksa shikeu kumtsu axineke, ikemu akithipu shimokeu xine ghi achenike.

¹⁸ Nino ithi akeuno Alhou tianuli shiluvekemiye axine shichemoke, ikemu Alhou Nu no pa khe acheni eno Alhoksau ye pa bumlae.

¹⁹ Nino ithi akeuno ayeghiqha kumtsuno Alhoksau kuka qholo ani, ikemu ninguye Alhou laumike.

²⁰ Nino ithi akeuno Alhou Nuno ighi puzu ithikututa shilukeu ningu tsupe puani, tishikeuno ninguye pa Nu Jisu Khristo gholo xukimepe akeu lono kuchou Lhou gholo ghi xukimepe ani. Hiye kuchou Lhou eno lhokta kuxuke.

²¹ Itianuliqo, kichileu lhou launo nonguye putosupe achelo!