Galatiami 3 - Sümi Tiqhelimi Bible

Aküpülü keo Ayeza kea

¹ Nongu Galatiami nikhanighaqo! Khuu no nongu chini-küghüzüvea kea? Nongu nhekithe lono Jisü Khristo yedapithive keu mütsümishei pìyevae.

² Ni ye nongu lau no thime lakhi ithive nishi anie: Nongu ye ayeza lo shikupulu keu vechewo Alhou Ghungu ithulu keo nongu no kiu chilu keno tipau pülü keu vechewo no kea?

³ Nongu ye kuchou no nikhanighami keshea? Alhou Ghungu vechewo nongu küxü huthuve kethiu no, nongu ye itehi ye ashi küxü gholau no ashekuho shi niye pükapütsa ani keshea?

⁴ Nongu ye adou lo ighono imeva keshea? Nongu ye adou lono imemo ke kumo keshea?

⁵ I no itaghi iniju ani, Alhou no pa Ghungu nongu tsü no akichiqhipu kümlàqo shi chekeu ye ayeza lo shikupulu keu vechewo no keo nongu no kiu chilu keno tipau pülü keu vechewo no kea?

⁶ Ike Abraham ghí tishi ke, pa no “Alhou pülüluve, eno tipau no pa ye achipiu mikuchomi kepi kihitsüe.”

⁷ Tishiaye, khunoqo no aküpülü ani keno panongu ye Abraham nuliqo kepi vethalulo.

⁸ Alhou no aküpülü vechewo Jewkumomiqo pelo achipikaluve pe nikeu azünatha ghi Kuchoyesü no ithuluve ke, eno Abraham vilo azüu no atsakiviu piputo tsüke: “Shiyeqo kümtsü O vechewo kümgha tsü kepu shi nani.”

⁹ Ikehu khunoqo aküpülü shou pükhü cheni keno panongu ye Abraham khuu aküpülü timi keno, pa gholo no kümghave tsüae.

¹⁰ Kughengu ayeza lo shikupulu keu shou pükhü chekemi kümtsü ishi yèpüa keu toi ghusho nani: “Khunoqo no Ayeza Kaku lo yèpüa keu kümtsü papemo nike no angsü shive pelo.”

¹¹ Mütsüqhei no ayeza shou pükhü chekemi khumu Alhou zülo achipikamla nani, kughengu “amikuchomi ye aküpülü vechewo xülu nani.”

¹² Ayeza ye aküpülü shou be chemoe; tishini ke züqhulo, ishi pi cheni, “Timi khuu no ayeza lo akeu papeluni keno tipau vechewo xülu nani.”

¹³ Khristo no ningu züqhu shi angsü puluve keu vechewo pa no ayeza ngusü lono ningu xachilelu ke, kughengu ishi yèpüani: “Timi khuu no kros lono tshüqhi thiveni keno pa ye müsüinivae.”

¹⁴ Abraham lau kükümgha tsüpüa keu Khristo Jisü vechewo Jewkumomi kümtsü lau ighílu penike ghenguno pa no ningu xachilelu ke, tishi keu lono ningu pelo aküpülü vechewo piqhipüa keu Aghungu Kimthe ithulu peniye ke.

Ayeza eno Pikiqhi

¹⁵ Athiküzümi eno achelimiqo, tsalakipe küxü lhoaye lono I no kiche-kipiye lakhi tsüní. Khunomu puloshoqhi kiyé shipe qhive keu kilive müla momu süküqhamla ketoi, hipau vehu lo ghí tishi ke.

¹⁶ Alhou no Abraham lau eno pa tikughukomiqo lau pikiqhi shike. Kuchoyesü lo “eno atikughukoqo lau,” ipi pipüamoe, tipau kiqi ye timi kutomo, ikemu “eno O tikughuko,” ipi pipüani, tipau kiqi ye timi lakhi, tiye Khristo ke.

¹⁷ Eno I no piakeu kiqi ye hipau ke: Alhou no Abraham vilo piqhi keu mpe 430 thiu no ayeza Moses tsüke ghenguno Alhou ye azüu puloshoqhi shipüa keu iqeve no pikiqhi ikhive anike kumoe.

¹⁸ Kughengu amheghi no ayeza shou bepe aghí ke aye tiye pikiqhi shou bepe anike kumovae; ikemu Alhou no paw küpükini lono pikiqhi lakhi vechewo Abraham tsüke.

¹⁹ Tishiaye kushiye ayeza tsüpüani kea? Ayeza ye ayeza hebideve keu ithi pe nikeu ghenguno süke, tiye Abraham tikughuko khuu lau pikiqhi shipüa keno pa no ighimo ke kutó ghenguno ke. Alhou no pa yeza kungumiqo vechewo Moses khuu Alhou eno timi dolo lakipiu keno pa tsüke.

²⁰ Lakipiu lakhi ye amqo kini dolo puloküqhalu pe nikeu ghenguno avehupu shi cheni. Ikemu Alhou ye lakhi kehu, kughou pa no Abraham lau pikiqhi shi keno pa ye lakipiu avehupu shimo ke.

²¹ Tighenguno, ayeza ye Alhou’w pikiqhiqo lakichile keshea? Khilemu tishimoe! Kughengu aküxü tsükulupu ghenguno ayeza tsüpüaghi ke aye, achipiumikucho ye mütsüqhei no ayeza vechewo ighini cheke.

²² Ikemu Kuchoyesü no pikeu kiqi lo thowkha kümtsü axiné ghaküsü qholo ani, tishianguno Alhou no kiu piqhipüani keno Jisü Khristo shou pülüluve kemiqo kümtsü pelo khaqhikiphe pikiqhi ithulu peniye ke.

Alhou Nuliqo

²³ Jisü Khristo shou pülüluve keu ghola ighi mphi züu, ningu ye khatha pesü ayeza qholo ake, tiye aküpülü ighi niye akeu pephe-piyemo ke kutólo khatha pe püake.

²⁴ Ike Khristo no ighino aküpülü lono ningu pelo achipikalu pemo ke kutólo ayeza no ningu kheu shi acheke.

²⁵ Ikemu itehi ye aküpülü hipau ighivea ke ghenguno, ayeza no ningu kheu shi akeu qholo ngomovae.

²⁶ Ike Khristo Jisü lono aküpülü vechewo nongu kümtsü Alhou nuliqo ke,

²⁷ kughengu nongu khunoqo no baptiz shilu keu vechewo Khristo gholo küqhaluvea keno nongu ye Khristo pepuluvae.

²⁸ Ikehu Jewmi ngò Jewkumomi, aqüaxemi ngò kuqhopheve kemi, kipitimi ngò totimi dolo kütüqü keu kühae, kughengu Khristo Jisü gholo kimepe akeu lono nongu kümtsü lakhi ke.

²⁹ Nongu no Khristo laumi aye, nongu ye Abraham kughukoqo ke, eno Alhou no piqhipüa keu kiqi lono nongu ye amheghi ighílu nani.