2 Kor. 4 - Sümi Tiqhelimi Bible

Itehi Miqemilei akeu eno Xülekuthu Küxü

¹ Tighenguno, Alhou’w kimiyekini vechewo ningu ye pichebekümlà hipau anike ghenguno ningu ye amlo hauve chemoe.

² Tike kumo no, ningu ye tuqhou eno akukujopu laghiqo qhivae; ningu ye pishikiqhi shichemoe, momu ningu ye Alhou tsa tuchighi chemoe. Tishini ke züqhulo, Alhou nhekithe lono mütsümishei shi kuchou pesü asheshu keu vechewo ningu likhi ningu pesü timi kümtsü lolo kighithi zülo ningu no xü cheni.

³ Eno tsalá ningu no kütsü chekeu tsakiviu küzüve aghí namu, tiye pühave akemiqo ghenguno küzüve anike.

⁴ Hipau tiqheli lhou no pülümo kemiqo kükümsü kighicheve tsüae, tishi keu vechewo panoqo pelo Khristo khuu Alhou jukimihi keno pa juküvü pephe-piye chekeu tsakiviu küvü ithulu pemo niye ke.

⁵ Kughengu ningu ye nilikhi nighili pesü kütsü chemoe ikemu Jisü Khristo ye Ampeu kepi kütsü cheni, eno ningu ye Jisü je ghenguno nongu qemi shi acheni.

⁶ Kughengu Alhou khuu no, “Aküvü pelo àküzǘ lono vüipeghi pelo,” ipi keno, Jisü Khristo gi lo Alhou juküvü pephe-piye keu ithilu kepu küvü ningu tsüní ke ghenguno pa küvü pesü ningu mlo lo yepüvü tsüke.

⁷ Ayeghi lo kiní ye ayeghi no mülà keu likoliqo lo qhicheni. Tihutoi, ningu shi phimpi lo Khristo tsakiviu kiní ani. Hipau vechewo Khristo tsakiviu küká ye ningu lau no kumo no Alhou lau no ighi kepi pìye ani.

⁸ Alaghi kümtsü lono ningu tsadaqhi ke, ikemu ningu munuqhivemoe; avehuizüve, ikemu amlo hauvemoe;

⁹ pishi-pujuqhi ke, ikemu nilikhi qhivemoe; hekuluqhi ke, ikemu kütsaqhivemoe.

¹⁰ Ningu ye alhokuthu ningu phimpi lo Jisü kithí xapu acheni, tishianguno Jisü küxü ghí ningu phimpi lo pephe-piye lupe niye ke.

¹¹ Kughengu ningu khunoqo aküxü ani keno alhokuthu lo Jisü je ghenguno akithipu lo ikhiphe pe tsüve acheni, tishi keu vechewo ningu thiveniküau phimpi lono pa küxü ghí pephe-piye lupe niye ke.

¹² Tishiaye, akithí ye ningu lolo mülà ani, ikemu aküxü no nongu lolo mülà anike.

¹³ Ishi yèpüani: “I no pülüluve ke ghenguno I no pivae.” Ningu ye aküpülü lhoaye aphiphi ke ghenguno ningu ghí pülü ani eno tighenguno piani,

¹⁴ kughengu ningu no ithi akeu no Alhou khuu akithí lono Ampeu Jisü xüputhu keno pa no Jisü gholo no ningu xüputhu nani eno nongu gholo no pa zülo ningu sasü ighi nani.

¹⁵ Hipaqo kümtsü nongu kivipu ghenguno ke, tishianguno küpükini khikhi timi kutomo lau tolu ani keno tipau vechewo Alhou juküvü lo shikimthi keu no qochili peniye ke.

¹⁶ Tighenguno ningu ye amlo hauve chemoe. Ningu phimpi ye tsümave aya kemu ningu lolo ye tsalà kipetsü akithé shikitheve tsü ani.

¹⁷ Ningu no aküpüna kitila eno ikhonhei sholu akeqo hu ye ningu pelo lhokta juküvü ithulu pe ani eno lhokta juküvü hu ye kütau kümtsü nguno akiqheu ke.

¹⁸ Ikehu ningu ye kiu ithulu ani keno tipau shou ningu mlo tsüqhiyi chemoe, ikemu kiu ithulu chemo keno tipau shou ningu mlo tsüqhiyi cheni. Kughengu kiu ithulu ani keno tiye ado kitila ghenguno ke, ikemu kiu ithulu chemo keno tiye lhokta ghenguno ke.