1 Thes. 1 - Sümi Tiqhelimi Bible

¹ Yesǜ hipau ye Paul, Silas eno Timothy lau no, Apù Alhou eno Ampeu Jisü Khristo vechewo Thessaloniami kukuhou lau yèlu ani: Küpükini eno aloino keu nongu gholo apeniu.

Thessaloniamiqo Küpülü ghenguno Shikimthikütsü

² Ningu ye nongu kümtsü küpülü ghenguno alhokuthu Alhou shikimthi acheni eno ningu kighini lo tamo no nongu jeku acheni.

³ Ningu ye ningu Lhou eno Apù zülo nongu küpülü vechewo akümlà ipeghi keu, kikimiye vechewo nongu kümlà kite keu, eno ningu Mpeu Jisü Khristo lono lajupu akeu no müzüsütsü keu vechewo nongu no kutuukulu shi akeu kümsülu acheni.

⁴ Alhou no kimiye chekemi athiküzümi eno achelimiqo, Alhou no nongu kisheluvea kepi ningu no ithi anie,

⁵ kughengu ningu tsakiviu ye nongu lau atsa vechewo likhi no ighimo ke ikemu aküka, Aghungu Kimthe eno thonhei keu küpülü ghí pesü ighike. Nongu ghenguno ningu ye kíshi nongu gholo xüache keno nongu no ithi ani.

⁶ Ampeu no xüpiye keu eno ningu no xüpiye keu kishishi nongu no xüke, kughengu nongu no shishe ime akeu dolo no Aghungu Kimthe no tsü keu lokiqi vechewo akükütsü sütsa ikhilu ke.

⁷ Eno tishi keu vechewo nongu ye Macedonia ngò Achaia lo küpülümi akemiqo kümtsü ghenguno akühapu lakhi shivae.

⁸ Ampeu kükütsü sütsa nongu vechewo ipeghi akeu ye Macedonia ngò Achaia lo likhi kumoe, ikemu Alhou lau nongu küpülü akeu ye aqha kuchopu ithive ake. Tighenguno hipau vehu lo ningu ye kiumu pi kepu kühae,

⁹ kughengu timi tipaqo ampi no ningu no nongu lau ighi kelo nongu no kíshi ningu ikhilu eno sasü tsü keno piakhani ke. Panongu no ningu vilo nongu ye ajulho lhou lau no kíshi kuchou eno xü akeu Lhou qe nike ghenguno tsüghǜ sü ighive keno ningu vilo pike.

¹⁰ Eno nongu ye Alhou Nu akithí lono xüputhuve keu no kungugha lono ighi niye akeu lo kíshi khe ani keno panongu no ningu vilo pike. Alhou Nu Jisü ye Alhou’w küghakütha chekeu lono ningu xalu keu hu ke.