1 Kor. 16 - Sümi Tiqhelimi Bible

Küpülümiqo Ghenguno Pekütsü Keu

¹ Itehi ye küpülümiqo ghenguno pekütsü keu vehu lo I no Galatiami kukuhouqo vilo kiu pi keno nongu ghi titoi shilo.

² Apinedo kümtsü lo atsala atüghiu lo nongu kümtsü no nongu no pisa iloghi keu lono hami pakütashi qhive no kütsü pe qhimoayesa ke, tishianguno kughou I no ighini keno pekütsü akeu shipemo niye ke.

³ Tishiaye kughou I no ighini keno nongu no timi kishè püaghi kemiqo lau no I no kilethi keu yèsüqo tsüpuwuni eno panongu pelo Jerusalem lo nongu ghò pesü wu peni.

⁴ I no wu kulupu shi aye panongu ye I sasü wu kepu shi nani.

Lüthü Shi Qhüiniju Keu

⁵ I no Macedonia kathave kethiu, ni ye nongu lau ighi nani—kughengu ni ye Macedonia hechesü wu nani ke.

⁶ Nongu gholo ado hami ngo luvi, momu süsü kutó ngo luvi, tishianguno I no khila-khila kicheghüzü shi wu namu nongu ye I kuphulu nani ke.

⁷ Kughengu ni ye itehi kicheghüzü shiche kelo ado ikhonhei ghengu likhi nongu sasü kusho keu shinishi amoe; Ampeu pulou shi aghí aye, ni ye nongu gholo ado hami ngo nike lakuju shi ani.

⁸ Ikemu ni ye Pentecost tsalà kutólo Ephesus lo ngo anani,

⁹ kughengu alá shikulupu kümlà shilu penike ghenguno I lau ahukikha kijè lakhi khaqhive tsüae, eno tilehi I lachile kemi kutomo ani.

¹⁰ Kughou Timothy ighini keno, pa no nongu gholo akelo pa pelo kiumu msà pe kevilo, kughengu pa ghí I toi Ampeu ghenguno mülà acheni ke.

¹¹ Tishiaye, timi khumu küthakügha shi pa peitha kepu kumoe. Aloino ghi aghüzüla lo pa puwulo tishianguno pa pelo I lau ideighi penike. Ni ye athiküzümiqo gholo pa ghí ighi nikeu huqhe anie.

¹² Itehi ye ningu thiküzüu Apollos vehu lo: Ni ye akumto shi pa vilo athiküzümiqo gholo no nongu lau wulo ipi hakite ani. Pa ye itehi wuni keu ighono pulomo no anie, ikemu kughou adokivi ighini keno pa ye wu nani ke.

¹³ O likhi O khekuto alo: aküpülü lo mutotoi puthugho lo; amlo kumto shilo; akumto shilo.

¹⁴ Thowkha kümtsü kikimiye lono shilo.

¹⁵ Nongu no ithi anike, Stephanas kibolomiqo ye Achaia lo küpülümi shitüghimiqo ke, eno panongu ye Ampeu’w timiqo kümlapù lo panongu likhi panongu ikhiphe pe tsüve ke. Athiküzümi eno achelimiqo, I no nongu qhüiniju akeu ye

¹⁶ nongu kümtsü titoi kemi shilo eno khunoqo no akümlà lo kutubo cheni eno ichhe-ime mülà acheni keno tipaqo lau nongu likhi nongu ikhiphe pe tsülo.

¹⁷ Kughou Stephanas ngò Fortunatus eno Achaicus pano küthü ighi keno ni ye alokivishi ke, kughengu nongu no kiu küha keno panongu no nongu lau süghi tsüke.

¹⁸ Kughengu panongu no I ngulho ghüthipüxü tsüke toi nongu ngulho ghí püxü tsüke. Hitoi keu timiqo ye gihu küzüpu ke.

Ashekuho Petha

¹⁹ Asia bocho lo akukuhouqo no petha nongu tsüpuwu ani. Aquila ngò Priscilla pama no Ampeu je lono petha nongu tsü ani, eno titoi panongu ki lono kuho chekemiqo no petha nongu tsü ani.

²⁰ Athiküzümi eno achelimi hilau akemiqo kümtsü no petha nongu tsü ani. Khristo vechewo lakhi no lakhi petha tsülo.

²¹ Ni Paul ampi no yèsü hipau yè ani.

²² Tsalá timi khuala no Ampeu kimiye cheghimo aye, timi tipau ye ghushove peniu! Ighilo, Ampeu!

²³ Ampeu Jisü’w küpükini nongu gholo apeniu.

²⁴ Khristo Jisü lono iw kikimiye nongu kümtsü lau tsü ani. Amen.