Sefela sa Salomone 8 - BIBELE

¹ Eka o ka be o le kgaitsedi ho nna, mme a o hodisitse ka letswele la hae! E ne etlare ha ke o fumana o le kantle, ebe ke a o aka, ho se be ya ka nnyatsang.

² Ke ne ke tla tsamaya le wena ke o ise lapeng heso, moo mme a ileng a nkgodisetsa teng; ke o nwese veine e nang le metswako, ke o nwese lero la dikgarenate tsa ka.

³ Ke samme tsoho la hae le letshehadi, ka tsoho la hae le letona o nkopile.

⁴ Lona baradi ba Jerusalema ke a le laya: Le se tsose moratuwa wa ka, kapa la mo sisinya, ho fihlela yena a ka rata ho tsoha.

Sefela sa botshelela Metswalle:

⁵ Ke mang eo ya tswang lehwatateng, a itshetlehile ka moratuwa wa hae? Tlasa sefate sa apole ke ile ka o tsosa, hona moo mmao a o emoletseng teng, hona moo mmao a o belehetseng teng.

Morwetsana:

⁶ Mpee fubeng sa hao jwaloka setempe, jwaloka lesekana nthwale tsohong la hao, hoba matla a lerato a tshwana le a lefu, sehloho sa lefufa se tshwana le sa lebitla. Lerato le tuka sa kganare e tlola ditlhase, jwaloka tetema e laima malakabe!

⁷ Matlopotlopo a metsi a ke ke be a le tima, esita le dikgohola di ke ke tsa le hohola; leha motho a ka fana ka ruo lohle la hae, ka lona a leka ho reka lerato, a ke ke a fumana letho, haese ho nyediswa!

Kgaitsedi tsa morwetsana:

⁸ Re na le letlamorwana la kgaitsedi, matswele a yona e sa le diolamolora. Re tla etsa jwang ka kgaitsedi ya rona, ha mohlankana a rata ho e hloma lesiba?

⁹ Haeba kgaitsedi e le lerako, re tla e hlomela tora ya silefera; haeba kgaitsedi e le monyako, re tla e kwala ka mamati a dikedare.

Morwetsana:

¹⁰ Nna ke lerako, matswele a ka a ka ditora, mahlong a moratuwa nna ke mmusapelo.

Mohlankana:

¹¹ Solomone o na ena le serapa, rapa sa morara Baale-Hamone, rapa sena sa hae a se hirisetsa balemi; hore balemi ba tle ba kotule tholwana tsa tshimo eo, molemi ka mong a lefa shekele tsa silefera di le sekete.

¹² Nna tshimo ya ka ya morara ke ena, wena, Solomone, nka shekele di le sekete, seabo sa balemi ke makgolo a le mabedi.

¹³ Wena ya phelang ka dirapeng, metswalle e mametse ho utlwa o bua; ako bue, le nna ke utlwe ntswe la hao.

Morwetsana:

¹⁴ Potlakela ho nna, wena moratuwa, o etsise tshepe kapa namane ya kgama, hodima thaba tse maririela a dinoko.