Sefela sa Salomone 6 - BIBELE

Metswalle:

¹ Moratuwa wa hao o ile kae, wena Seilatsatsi hara basadi ba bang? Moratuwa wa hao o nkile efe tsela, re tle re tsebe ho o batlisa yena?

Morwetsana:

² Moratuwa o theohetse ka rapeng sa hae, ka ratswaneng se metseng dinoko, ho ithabisa ka serapeng le ho kga mehaladitwe.

³ Moratuwa ke wa ka, le nna ke wa hae, o fudisa mohlape wa hae, o o fudisa mehaladitweng.

Sefela sa bohlano Mohlankana:

⁴ O motle, moratuwa, o tshwana le Tiresa, o rateha jwaloka Jerusalema, o boheha sa mabotho a tshwere mekgele.

⁵ Tlohela ho ntjheba, o shebe hosele, mahlo a hao a mpakela pherekano. Moriri wa hao o ka mohlape wa dipodi ha di lepella Thabeng ya Gileade.

⁶ Meno a hao a ka mohlape wa dinku di nyoloha moo di tswa hlatsuwa teng; thojana ka seng se tswetse mafahla, ha ho le se seng sa tsona se sa tswalang.

⁷ Marama a hao a kwahetsweng ke lesira, a tshwana le kgekge ya kgarenate, kgarenate e petsotswe.

⁸ Mafumahadi a ka ba mashome a tshelela, basadi ba mafielo ya eba mashome a le robedi, barwetsana ya eba boiyane, ntlhokapalo;

⁹ empa leebana la ka, pabala ya ka, ke lona feela, ke moradi wa mmae ya tswetsweng a le inotshi, thatohatsi ya mosadi ya ileng a mmeleha. Barwetsana ha ba mmona ba re o hlohonolo, mafumahadi le basadi ba mafielo ba a mo rorisa.

¹⁰ Ke mang eo ya hlahang eka mafube, ya leredi jwaloka kgwedi, ya kganyang seka letsatsi, ya bohehang sa mabotho a tshwere mekgele?

¹¹ Ka theohela ka serapeng sa fate tsa ditholwana, ho hlahloba tse melang botjha kahara kgohlo, ho bona hore na morara o so fupile, na dikgarenate tsona di se di thuntse.

¹² Yare ke eso ka ke ela hloko, ka ikutlwa eka ke moholo ho feta kgosana, kgosana e busang boiyane ba setjhaba sa yona.

Metswalle:

¹³ Kgutla! Kgutla! Mosetsana wa Moshulame! Kgutla! Kgutla! Re tsebe ho o tadima! Le tadimelang mosetsana wa Moshulame, sa ha le tadima mabotho a teanya ditheko?