KOLI-YA-MALLA 3 - BIBELE

Kotlo, tshokoloho le tshepo

¹ Ke nna motho ya tsebang matshwenyeho, ke otlilwe ka thupa ya Morena, Morena a halefile.

² O nkgothomeditse, a re ke tsamaye, ke tsamaye lefifing, e seng leseding.

³ Ruri o nkotlile ka letsoho la hae, a nkotla a bile a phetella, a nkotla letsatsi lohle.

⁴ Letlalo la ka o le tlatsitse dibabetsi, masapo a ka o a swahlamantse.

⁵ O nketseditse sakana-la-nkope, a nkopela ka mahlomola le ka ditsietsi.

⁶ O mpeile fifing le letsholetsho, ke jwaloka bafu ba kgalekgale.

⁷ O ntinkeditse hoo nke ke be ka phonyoha, a ntlama ka mahlaahlela a lethose a boima.

⁸ Leha ke bokolla, ke batla thuso, thapelo ya ka ha a e mamele.

⁹ O thibetse mmila wa ka ka kakawe tsa majwe, tsela ya ka o e kgopamisitse.

¹⁰ Morena o ntaletse jwaloka bere, a ntalla sa tau e le ka letsabeng.

¹¹ O nkgelositse tseleng ya ka, a ntsekolla, a ntshiya moo ke hloka mothusi.

¹² A hula seqha sa hae, a fula, a nketsa sekgopi sa metsu ya hae.

¹³ O hlabile diphiyo tsa ka ka metsu, metsu e tswang sehlajweng sa hae.

¹⁴ Tjhabeng sa heso ke fetohile sesomo, se nteola ka dipina letsatsi lohle.

¹⁵ O ntlopile tse babang sa leshokgwa, a ba a ntlopa le lona lengana.

¹⁶ O nthobile meno ka ho ntjesa lehlohlojane, a mpudukanya hodima molora.

¹⁷ Pelo ya ka o e amohile kgotso, le boiketlo ha ke sa bo tseba.

¹⁸ Yaba ke re: “Matla a ka a se a mpheletse, tseo ke di tshepetseng Morena di se di fetile!”

¹⁹ Ke hopola matshwenyeho a ka le ditsietsi tsa ka, ho nna ke lengana le leshokgwa le babang!

²⁰ Pelo ya ka e di hopola kamehla, e nyahame ka sefubeng sa ka.

²¹ Tsena ke sa ntsane ke di hopola, kahoo ke sa ntsane ke ena le tshepo.

²² Ka baka la lerato la Morena, rato le sa feleng, ha re a ka ra ba ra timela, mehauhelo ya hae ha e eso ka e kgaotsa;

²³ hoseng ho hong le ho hong e a ntjhafala, botshepehi ba hae bo boholo haholo!

²⁴ Ka pelong ya ka nna ke re: “Morena ke yena kabelo ya ka, kahoo ke itshepetse yena feela.”

²⁵ Morena o molemo ho bohle ba mo tshepang, o molemo ho bohle ba mmatlang.

²⁶ Ho molemo ha motho a eba le letshepa, a lebella ka mamello hore Morena a mo pholose.

²⁷ Ho molemo ha motho a jara joko ena, a e jara nakong ya botjha ba hae.

²⁸ A dule a le mong, a dule a kgutsitse, hobane o e jarisitswe ke Morena.

²⁹ A obamele fatshe ho hlompha Morena, mohlomong thuso e ka nna ya mo hlahela.

³⁰ A se ke a thibela ya mo jabelang lerama, a mamelle mahlapa wohle a mo tlelang.

³¹ Morena ha a ke be a lahle batho, ha a ke a ba lahlela molahlelaruri!

³² Leha a tlisa maswabi, o utlwela bohloko, ka baka la boholo ba mehauhelo ya hae.

³³ Hase hore ho hlokofatsa batho o a ho thabela, kapa hona ho ba tlisetsa maswabi.

³⁴ Ho hatakela batshwaruwa ka leoto, batshwaruwa bohle ba teng lefatsheng;

³⁵ ho hanela motho ka tokelo tsa hae, ha motho a le kapela Ya Hodimodimo;

³⁶ ho sokamisa toka ka makgotleng, na tsee tsohle Morena ha a di bone?

³⁷ Ya ka bolelang ntho, ya etsahala, ke mang, haeba ntho eo e sa laolwa ke Morena?

³⁸ Na tse bohloko le tsona tse monate ha di tswe ho Ya Hodimodimo?

³⁹ Kahoo motho a ka belaetswa ke dife, ha motho a otlelwa dibe tsa hae?

⁴⁰ A re hlahlobeng tsela tsa rona, re di lekole, ebe re boela re kgutlela ho Morena.

⁴¹ A re phahamiseng dipelo le matsoho a rona, re di phahamisetse ho Modimo, Modimo ya mahodimong, re re:

⁴² “Re sitilwe, ra ba ra kweneha, wena Morena ha o a re tshwarela.

⁴³ “O re phaladisitse o halefile haholo, wa re bolaya o sa re hauhele.

⁴⁴ O ikgurumeditse ka leru, o ipatile, hore thapelo tsa rona di se fihle ho wena.

⁴⁵ O re entse hore re be mahohodi, re be thotobolo hara baditjhaba.

⁴⁶ Dira tsa rona tsohle di re bebenyetsa melomo, di a re swenyetsa.

⁴⁷ Re tshwerwe ke tshabo, leraba le re kgatile, re fihletswe ke tshenyeho, re fihletswe le ke timelo.”

⁴⁸ Mahlo a ka a phorosela dikeledi, di phorosela sa metsi a nokana, ka baka la ho timetswa ha setjhaba sa heso.

⁴⁹ Mahlo a ka a tla keleketla dikeledi, di keleketle motjha-o-tjhele, di sa kgaotse, di keleketle jwalo, mahlo a sa phomole,

⁵⁰ ho fihlela Morena a tadima fatshe, a tadima a le lehodimong, mme a re bona.

⁵¹ Ke utlwiswa bohloko ke seo ke se bonang, ka baka la basadi ba motse wa heso.

⁵² Ke phaladisitswe ke dira tsa ka ho se lebaka, tsa mphaladisa sa ha ho phaladiswa nonyana.

⁵³ Di nkakgetse ka mokoting ke ntse ke phela, molomo wa mokoti tsa o kwala ka lejwe.

⁵⁴ Metsi a phophoma hodima hlooho ya ka, ka ba ka re: “Jwale ke kgatheng la ho timela!”

⁵⁵ Ka bitsa lebitso la hao, wena Morena, ka le bitsa ke le botebong ba mokoti, tlase.

⁵⁶ Wa utlwa lentswe la ka ha ke ne ke re: “Se thibe tsebe ya hao ha ke fehelwa, ha ke fehelwa ke bile ke ipiletsa.”

⁵⁷ Wa atamela ho nna ha ke ipiletsa, wa re ho nna: “O se ke wa tshaba!”

⁵⁸ Ha ke ne ke qoswa o ila nkemela, Morena, yaba bophelo ba ka o a bo pholosa.

⁵⁹ O bone kamoo ke tujwang kateng, ako nkahlolele ka toka, Morena!

⁶⁰ Boiphetetso ba bona bohle o bo bone, le mano wohle ao ba ntherelang wona.

⁶¹ Nyefolo tsa bona o di utlwile, Morena, le mano wohle ao ba ntherelang wona;

⁶² dipuo tsa bao e leng dira tsa ka, merero eo ba ntherelang yona letsatsi lohle.

⁶³ Esita ba eme, esita ba dutse, ka nako tsohle nna ke pina ya bona!

⁶⁴ Ba otlele diketso tsa bona, Morena, ho ya ka mesebetsi ya matsoho a bona.

⁶⁵ Ako thatafatse dipelo tsa bona, thohako ya hao e ba wele hodimo!

⁶⁶ Ba hlorise, o ba timetse kgalefong ya hao, o ba timetse, o be o ba fedise, o ba fedise tlasa mahodimo a hao.