Jobo 29 - BIBELE

Jobo o ikgopotsa boiketlo ba hae ba pele

¹ Jobo a ntshetsa puo ya hae pele, a re:

² “Eka nkabe ke phela sa kgwedi tse fetileng, sa matsatsi a ha Modimo a ne a ntisitse;

³ ha bone la hae le ne le mponesetsa tsela, ka sedi la hae ke tsamaya le lefifing!

⁴ Eka nkabe ke le matsatsing a botjha ba ka, ha tswalle sa Modimo se sa sireletsa lapa la ka,

⁵ ha Ya Matla wohle a ne a sa na le nna, bana ba ka ba mpotapotile;

⁶ ha lebese le ne le phalla tseleng ya ka, mafika a kopotsa phororo tsa ole.

⁷ “Ha ke ne ke eya kgorong ya motse, ke bea tulo sa ka lebaleng la motse,

⁸ batjha ha ba mpona ba ne ba sutha, maqheku a phahame, a eme ka maoto;

⁹ mahosana le wona a kgaotse ho bua, ka matsoho a wona a ithibe melomo;

¹⁰ babusi le bona ba kgaotse ho bua, maleme a bona a maname mahalapeng.

¹¹ “Ya neng a nkutlwa o na mpua hantle, ya neng a mpona yena a mpakela;

¹² ke ne ke lopolla mafutsana a llelang thuso, ke lopolla le yona kgutsana e se nang mothusi.

¹³ Ya kgatheng la ho shwa o na ntlhohonolofatsa, mohlolohadi yena ke thabisa pelo ya hae.

¹⁴ Ho loka e ne le seaparo sa ka, kahlolo ya ka e le kobo le moqhaka wa ka.

¹⁵ Ke ne ke le mahlo a ba foufetseng, ke bile ke le maoto a ba holofetseng.

¹⁶ Ke ne ke le ntata bafumanehi, ke le mmuelli wa bao ke sa ba tsebeng.

¹⁷ Ke ne ke roba mekwetsepe ya ba kgopo, ke pholose ba seng ba le menong a bona.

¹⁸ “Ka ithetsa, ka re: ‘Ke tla shwela lapeng ha ka; matsatsi a ka a ngatafale sa lehlabathe,

¹⁹ metso ya ka e name ho ya fihla metsing, phoka e lale makaleng a ka, e lale bosiu bohle,

²⁰ tlotla ya ka e nne e ntjhafale, seqha sa ka se ntjhafale tsohong la ka.’

²¹ “Ha ke bua batho ba ne ba mmamela, ba lebelle keletso ya ka ba kgutsitse.

²² Ha ke buile e ne e ba le se le dumme, polelo tsa ka di kena hamonate tsebeng tsa bona.

²³ Ba ne ba ntebella sa ha ho lebellwa pula, polelo tsa ka di thopothela sa pula ya selemo.

²⁴ Ha ke tsheha le bona ba ne ba tlala letshepa; ha fahleho sa ka se ela, ebe ba tsoha molota.

²⁵ Ke ne ke le morena, ke ba supisa tsela, ke phela jwaloka kgosi hara mabotho a yona, jwaloka ya tshedisang ba apereng bofifi.”