Jobo 27 - BIBELE

Jobo o hlalosa moputso wa ba kgopo

¹ Jobo a tswela pele ka puo ya hae, a re:

² “Ka Modimo ya phelang, ya nkamohileng toka, ka Ya Matla wohle, mohlokofatsi wa moya wa ka;

³ ha feela nna ke sa ntsane ke phela, ke ntse ke phefumoloha moya wa Modimo,

⁴ molomo wa ka o ke ke be wa bua bokgopo, leme la ka le ke ke be la bolela bohata.

⁵ Ha nka ke ka dumela hore le nepile, ke tla be ke yo shwa ke ntse ke itatola.

⁶ “Ho loka ha ka ke boshwa-bo-tshwerwe, ha ke ntse ke phela tswalo le ke ke la nkgwebetha.

⁷ “Dira tsa ka di ke di tshwane le ba kgopo, bantwantshi ba ke ba be jwaloka balotsana.

⁸ Letshepa la moetsadibe ke lefe, mohla Modimo a mo amohang bophelo?

⁹ Na Modimo a ka mamela, a mamela sello sa hae, ha tlokotsi e se mo wetse hodimo?

¹⁰ Na yena o tla thabela Ya Matla wohle, a ipiletse ho Modimo ka nako tsohle?

¹¹ “Ke tla le ruta seo matla Modimo a leng sona; merero ya Ya Matla wohle nke ke be ka e pata.

¹² Tsena tsohle le lona ka mahlo le di bone; ke ka baka lang ha le ntse le bua mafeelafeelane?

¹³ “Seo Modimo a se abetseng ya kgopo, lefa leo Ya Matla wohle a le abetseng ya sehloho, ke lena:

¹⁴ Leha a ka atelwa ke bana, ba tla shwa ka sabole, tloholo tsa hae di ke ke tsa anelwa ke dijo;

¹⁵ masalla a hae a tla shwa ke lefu la sewa, bahlolohadi ba hae ba ke ke ba mo llela.

¹⁶ Leha a ka bokella silefera e kaa ka lehlabathe, bongata ba aparo tsa hae ba ba kaa ka letsopa,

¹⁷ tsa etsa pokella, ya lokileng o tla di apara; ba se nang molato silefera ba e arolelane.

¹⁸ O hahile ntlo e fokola sa bolepo ba sekgo, e tshwana le lephephe la motshosi masimong.

¹⁹ O robala a ruile e le kgetlo la ho qetela; ere ha a phaphama a tsohe a itlhophere.

²⁰ Tsietsi di mo wela hodimo jwaloka sekgohola, fefo se mo fefola bosiu ha ho robetswe.

²¹ Moya wa botjhabela o a mo nka, o ikele ka yena, o mo pheulele hole le lapa la hae;

²² o puputlele ho yena o se na mohau, e be lekgerakgara ha a leka ho o baleha.

²³ Ba mo opela diatla, ba be ba mo je tlepane, ba mo letsetse molodi ha a tloha lapeng ha hae.”