Jobo 13 - BIBELE

Jobo o re ha a na molato

¹ “Tsena tsohle ke di bone ka mahlo a ka, ka tsebe tsa ka ka di utlwa, ka di utlwisisa.

² Ke tseba tsena jwalokaha le lona le di tseba, etswe le hona ha le mphete ka letho!

³ Ke lakatsa ho bua le Ya Matla wohle, ho ipiletsa ho Modimo ke ho tjhesehela haholo.

⁴ Lona le baqapi ba mashano a se na ditswako, kaofela ha lona le bo-ngakana-kea-hetla.

⁵ Eka le ka kgutsa ho bua, la kgutsetsa ruri! Hoo e ne tla be e le bohlale, e le bohlale ho lona!

⁶ Jwale mamelang ha ke ikarabella, le utlwe ha ke ipuella ka molomo wa ka.

⁷ Na le buella Modimo ka ho bua bokgopo? Na le ka mmuella ka ho bua mashano?

⁸ Ebe le leka ho sekamela ka ho Modimo, kapa le iketsa babuelli ba hae nyeweng?

⁹ Ha a le hoqisa ka dipotso ho tla ba jwang? Le tla mo soma jwalokaha le soma motho?

¹⁰ Ruri o tla fela a le kgaleme, ha le sebetsa leeme ka lekunutu.

¹¹ Na tlotla ya hae ha e tlo le kenya letswalo, kgalefo ya hae e tsubellele hodima lona?

¹² Maele a lona a tshwana le molora hantle, boitshireletso ba lona bo tshwana le ba letsopa.

¹³ “Kgutsang, le nna ke tsebe ho bua, se ntlhahelang se mpe se ntlhahlele.

¹⁴ Ke kena kotsing ke ntse ke tadimile, bophelo ba ka ke bapala diketo ka bona!

¹⁵ Haeba a mpolaya ke tla nne ke mo tshepe, ke tla buella metsamao ya ka thaka di tadimane.

¹⁶ Hona e tla ba yona pholoho ya ka: Moetsadibe a ke ke a ema kapele ho yena.

¹⁷ Mamelang mantswe ana a ka, le a mamele ka hloko, polelo tsena tsa ka le di sekehele tsebe.

¹⁸ Bonang jwale, nyewe ya ka ke e radile, ke a tseba ke tla fumanwa ke se molato.

¹⁹ Ke mang ya ka tsekisanang le nna? Ha a le teng ke tla kgutsa, ke itjhwelle.

²⁰ “Oho, Modimo, ako ntumelle ka ntho di le pedi, mme nke ke be ka ipatela wena:

²¹ Ako tlosetse tsoho la hao hole le nna, kgalefo ya hao e se ke ya ntshosa;

²² nkise kgotla ke tle ke o arabe, o ntumelle ke bue, le wena o nkarabe.

²³ Ke entse makgopo le dibe di le kae? Ako ntsebise tshito tsa ka le sebe sa ka.

²⁴ Ke hobaneng ha o mpatela fahleho sa hao, o ntadima ke se ke le sera sa hao?

²⁵ O tla lelekisana le lehlaku, lehlaku le feferetseha le moya, o lelekisane le mmoko o omeletse?

²⁶ O nqosa ka tse bohloko, o nkotlela makgopo a botjha ba ka.

²⁷ Maoto a ka a tlamilwe ka mahlaahlela, tselana tsa ka tsohle o a di lekola, bohato ba maoto a ka o a bo thaleha.

²⁸ “Kahoo motho o motela sa ntho e bodile, o naphoha sa kobo e jelwe ke tshwele.”