Isaia 38 - BIBELE

Ho kula le ho fola ha kgosi Hesekiya

¹ Mehleng eo Hesekiya a kulela lefu. Yaba moporofeta Esaya, mora wa Amose, o fihla ho yena, o re: “Morena o bua tjena: ‘Lokisa tsa lelapa la hao, hobane o tla shwa; o ke ke wa hlola o phela.’ ”

² Jwale Hesekiya a retelehela leboteng, a rapela Morena, a re:

³ “Oho, Morena, ke a o kopa: Ako hopole kamoo ke o sebeleditseng kateng ka botshepehi, le ka pelo e se nang mano, mme ka etsa tse lokileng mahlong a hao.” Yaba Hesekiya o lla habohloko.

⁴ Lentswe la Morena la fihla ho Esaya, la re:

⁵ “Eya, o bolelle Hesekiya, o re: ‘Morena Modimo wa ntataomoholo Davida, o bua tjena: Ke utlwile thapelo ya hao, mme ke bone meokgo ya hao. Ke tla eketsa ditshiu tsa hao ka dilemo tse leshome le metso e mehlano.

⁶ Wena le ba motse ona, ke tla le namolela matsohong a kgosi ya Asiria. Motse ona ke tla o sireletsa.

⁷ “ ‘Pontsho ya hore Morena o tla phethisa seo a se buileng ke ena:

⁸ Moriti wa letsatsi o hodima letlapa le supang nako, le entsweng ke Akase, ke tla o tjhetjhisetsa morao ka mehato e leshome.’ ” Yaba moriti o tjhetjhella morao ka mehato e leshome eo o neng o se o e tsamaile.

⁹ Yare hoba Hesekiya, kgosi ya Juda, a fole, a ngola sefela sena, a re:

¹⁰ “Ke ne ke itse: Ke tla falla ke sa le motjha, ke theohele kgorong ya Nqalo ya Bafu, hobane ke amohilwe lemo tsa bophelo ba ka, tse sa setseng.”

¹¹ Ka ba ka re: “Ha ke sa tla bona Morena fatsheng la ba phelang, le motho ha ke sa tla mmona hara baahi ba lefatshe.

¹² Leaho la ka le qhaqholotswe, le tlositswe ho nna, le qhaqholotswe jwaloka motebo wa modisana. Tshiu tsa ka di kgaotswe sa selohi se kgaola dikgwele, kgwele tse lohang lesela, tsa ba tsa kgaolwa jwalokaha tshwele e kgaolwa. Ka dinako tsohle ke ne ke re o tla ntimetsa.

¹³ Ka sesa bosiu ke ntse ke lla ke bohloko, jwalokaha eka tau e nthoba masapo, ka dinako tsohle ke ne ke re o tla ntimetsa.

¹⁴ Ka lla sa lefokotsane kapa sa moholodi, ka kuruetsa sa leebana-kgorwana. Mahlo a ka a kgathetse ke ho lelalela hodimo, Morena, ke ditlallong, tloo, o tlo nthusa.”

¹⁵ Empa jwale ke tla reng? O buile ho nna, sena se entswe ke yena, ke tla ikokobetsa ka lemo tsohle ha ke ntse ke phela, le hoja pelo ya ka yona e le bohloko.

¹⁶ “Morena, batho ba phela hara tse jwalo, moya wa ka le wona o matlafatswa ke tsona; aku mpuseletse bophelo, ke tle ke phele.

¹⁷ Bohloko ba pelo ya ka bo fetohile pholoho, rato la hao le mphemisitse lemena la timelo, o furaletse dibe tsohle tsa ka.

¹⁸ Nqalo ya Bafu e ke ke ya o rorisa, lefu le ke ke la o binela pina, ba theohelang lebitleng ha ba ka ke ba o tshepa.

¹⁹ Ke ya phelang, ya phelang feela, ya ka o rorisang jwaloka nna. Ntata bana o ba ruta tsa botshepehi ba hao.

²⁰ Morena ke yena ya tla mpholosa; ka matsatsi wohle a ho phela ha rona, re tla mminela ka diletsa tse nang le dikgwele, re mminele re le ka Tempeleng ya hae.”

²¹ Yaba Esaya o re: “Tlisang polokwana ya mangangajane a feiye, le e tlamelle hodima lethopa, mme o tla fola.”

²² Hesekiya a botsa, a re: “Pontsho ya hore ke tla nyolohela Tempeleng ya Morena e tla ba efe?”