Isaia 14 - BIBELE

Bathopuwa ba a kgutla

¹ Morena o tla hauhela Jakobo, a boele a ikgethele Baiseraele, a ba ahise naheng ya bona; baditjhaba ba tla aha le bona, ba kgomarele ntlo ya Jakobo.

² Tjhaba di tla felehetsa Baiseraele, di ba felehetse ho ya naheng ya bona; Baiseraele ba tla okamela ditjhaba, ba di etse bahlanka naheng ya Morena, ba di etse makgabunyane naheng ya Morena. Ba tla thopa bathopi ba bona, ba buse bahatelli ba bona.

Kgosi ya Babilona e se e le boyabatho

³ Mohla Morena a le phomoditseng ditsietsing, le moferefereng le bokgobeng bo sehloho,

⁴ le tle le bine pina ena e somang kgosi ya Babilona: “Bonang kamoo mohatelli a weleng kateng! Bonang kamoo kgalefo ya hae e fedileng kateng!

⁵ Morena o robile molamu wa ya kgopo, lere la puso la babusi o le robile,

⁶ lona le otlileng ditjhaba ka kgalefo, le sa kgaotse, la di kokobetsa ka kgalefo le ka mabifi a sa feleng.

⁷ “Fatshe lohle le phomotse, le na le kgotso, bohle ba tsanyaola dipina ka thabo.

⁸ fate tsa modutu le kedare tsa Lebanone, di thabetse ho wa ha hao, di re: ‘Ha e le mona o se o kokobeditswe, ha ho ya sa tla nyoloha, a nyolohele thabeng ho re rema.’

⁹ “Nqalo ya Bafu e etsa mokutu ho o kgahlanyetsa, e tsosa bafu ho o dumedisa, bohle bao e neng e le babusi lefatsheng; bohle bao e neng e le dikgosi tsa ditjhaba, e ba emisa diteroneng tsa bona.

¹⁰ Bohle ba tla bua, ba re ho wena: ‘Athe le wena o ntso hloka matla jwaloka rona, kajeno o so tshwana le rona!’

¹¹ Botlotlehi ba hao bo theohetse lebitleng, bo theohetse mmoho le melodi ya katara tsa hao; tshenyane e fetohile moalo wa hao, diboko di fetohile kobo ya hao.

¹² “O theohile hakaakang lehodimong, wena Mphatlalatsane, naledi ya meso! O dihetswe lefatsheng, wena ya kileng a kokobetsa ditjhaba!”

¹³ O ile wa bua ka pelo, wa re: “Ke tla nyolohela lehodimong, ke phahamise terone ya ka, ke e phahamisetse kahodimo ho dinaledi tsa Modimo, ke bee terone ya ka thabeng eo ho phuthehelwang ho yona, ke e bee tlhorong e phahameng ya thaba e ka leboya.

¹⁴ Ke tla hlwella kahodimo ho maru, ke itekanye le Ya Phahametseng tsohle.”

¹⁵ Empa wena o dihetswe tlase lebitleng, o dihetswe tlase botebong ba mohohlo.

¹⁶ “Ba o bonang ba tla o makalla, ba o tadimisise hantle, ba re: ‘Na eo ke yena monna ya ileng a sisinya lefatshe, ya neng a etsa hore mebuso e thothomele;

¹⁷ yena monna ya ileng a fetola lefatshe nahathothe, yena ya ileng a timetsa metse ya lona, yena ya sa kang a dumella bathopuwa, ho kgutlela ha habo bona?’

¹⁸ Kgosi tsa ditjhaba tsohle di phomotse, di phomotse ka hlompho ka mabitleng a tsona;

¹⁹ empa wena o lahletswe kantle ho lebitla la hao, wa lahlelwa kantle sa lekala le nyatseha, topo tsa babolauwa di entse setha hodima hao, bona ba ileng ba bolawa ka sabole, bona ba ileng ba theolelwa mohohlong o majwe, ba theolelwa jwaloka setopo se hataketswe ka maoto.

²⁰ O ke ke be wa epelwa jwaloka kgosi, tsa tjhaba tse ding, hobane o sentse naha ya hao, wa bolaya tjhaba sa heno. Tloholo tsa ba kgopo ha di sa tla hopolwa.

²¹ Lokisang sebaka sa ho bolaela bara ba hae, ka baka la dibe tsa bo-ntata bona, esere ba tsoha, naha ena ba e ja lefa, ba haha metse ya tlala lefatshe.”

Modimo o tla timetsa Babilona

²² “Ke tla ema ke ba futuhele,” ho rialo Morena wa mabotho; “ke tla timetsa bitso la Babilona le masalla a yona, ke timetse bana ba yona le ditloholo tsa yona,” ho rialo Morena.

²³ “Babilona e tla ba hae, habo dinoko, e fetohe naha ya mekgwabo; ke tla e fedisa ka lefielo la timetso,” ho rialo Morena wa mabotho.

Modimo o tla timetsa Baasiria

²⁴ Morena wa mabotho o hlapantse, a re: “Jwalokaha ke hopotse, ho tla ba jwalo; jwalokaha ke rerile, ho tla phethahala.

²⁵ Ke tla phetshela Baasiria naheng ya ka, dithabeng tsa ka ke ba hatakele; joko ya bona ke tla e tlosa hodima tjhaba sa ka, mojaro wa bona ke o tlose mahetleng a sona,

²⁶ Morero ona ke o etseditsweng lefatshe lohle, lena ke letsoho le phahamiseditsweng ditjhaba tsohle.”

²⁷ Morena wa mabotho o sa rerile; ebe ke mang ya ka thibelang? Letsoho la hae le se le phahame; ke mang ya ka le kgutlisang?

Modimo o tla timetsa Bafilesita

²⁸ Bona ke boporofeta bo ileng ba bolelwa ka selemo seo kgosi Akase a ileng a shwa ka sona:

²⁹ Se nyakalleng lona Bafiletsita bohle, la re molamu o neng o le otla o robehile, hoba lelokong la noha eo ho tla tswalwa qowane, yona e tswale kganyapa e fofang ka setsokotsane.

³⁰ Ba futsanehile baholo ba tla kgora, bahloki ba tla dula ba pholohile, ditloholo tsa hao tsona di shwe ke tlala, masalla a hao le wona e a bolaye.

³¹ Bokolla wena monyako! Meketsa wena motse! Lona bohle ba Filesitiya thothomelang! Mosi o kang leru o foqoha o etswa leboya, hara mabotho a hae ha ho ya tla salla.

³² Ho tla thweng ha ho arajwa maqosa a naha eo? “Morena o tsitsisitse Sione, bahlophehi ba tjhaba sa hae ba tla tshabela teng.”