Diproverbia 5 - BIBELE

Keletso mabapa le dihlola

¹ Mora wa ka, ela bohlale ba ka hloko, thuto ya ka o e sekehele tsebe,

² o tle o be le tlhalohanyo, molomo wa hao o rue tsebo.

³ Molomo wa mosadi wa sehlola o qhitsa dinotshi, leme la hae le borethe ho feta leokwana;

⁴ qetellong le baba sa leshokgwa, le bohale sa sabole, sabole e mahalemabedi.

⁵ Maoto a hae a theohela lefung, mehato ya hae e lebisa lebitleng;

⁶ tsela ya bophelo ha a re letho ka yona, metsamao ya hae e kgopametse moo a sa tsebeng.

⁷ Kahoo bana ba ka, mmameleng ke hona: Polelo tsa ka le se ke la di kgeloha;

⁸ le tsamayeng tseleng tse hole, tse hole le sehlola, monyako wa ntlo ya sona le se o atamele,

⁹ esere matla a lona a itjellwa ke ba bang, dilemo tsa lona tsa fella ho ya sehloho,

¹⁰ ba bang ba ithabisa ka maruo a lona, mofufutso wa lona wa ruisa lapa lesele.

¹¹ Qetello ya bophelo ba hao e tla ba mefehelo, ha mmele wa hao o motetse, o so le masatswane.

¹² O tla re: “Ke ne ke hloile ho kgalengwa, ho ntshwa diphoso le hona ke ho hloile!

¹³ Thuto tsa baruti ba ka ke ne ke sa di natse, balai ba ka le bona ke sa ba mamele.

¹⁴ Jwale ke fihlile dintshing tsa timelo, ke eme kahara phutheho yohle.”

¹⁵ Jwale nwa metsi a diba sa ho tjhekwa ke wena, metsi a phallang a mohlodi wa hao.

¹⁶ O re bonna ba hao bo tsholohele ditseleng, matla a bona a hafakwe mabaleng?

¹⁷ Eka kgona e be ba hao o le inotshi, o se ka bo abelana le ba bang.

¹⁸ Bonna ba hao bo ke bo hlohonolofale, o ithabise ka mosadi wa hao wa matswathaka,

¹⁹ ya ratehang sa tshepe, ya natlailang sa kgama; kamehla matswele a hae a o thabise, kamehla rato la hae le ke le o hohele.

²⁰ Mora wa ka, ho ya kang ha sehlola se o hohela? O manamelang fubeng sa mosadi wa motho?

²¹ Tsela tsohle tsa motho Morena o a di bona, metsamao yohle ya hae le yona o a e lekola.

²² Motho ya kgopo o tshwaswa ke makgopo a hae, dikgwele tsa dibe tsa hae di mo kgatele ruri.

²³ O tla bolawa ke ho hloka kgalemo, tsela a e kgeloswe ke bothotohadi ba hae.