Diproverbia 25 - BIBELE

Maele a mang a Solomone

¹ Ana le wona ke maele a Solomone, ao banna ba Hesekiea, kgosi ya Juda, ba ileng ba a bokella, ba a ngola:

² Tlotla ho Morena ke ho etsa ditaba sephiri, athe tlotla ya dikgosi ke ho phenyaphenya ditaba.

³ Jwalokaha mahodimo a phahame, fatshe lona le le tlase, menahano ya dikgosi le yona e ke ke ya fihlelwa.

⁴ Hlwekisa silefera ka ho e ntsha manya, lelala le tle le tsebe ho bopa nkgo ka yona.

⁵ Hleka ba kgopo kapele ho kgosi, terone ya yona e tle tsitsiswe ke ho loka.

⁶ Se ke wa ikakasa kapele ho kgosi, kapa wa dula tulong tsa mahosana;

⁷ ho molemo ha kgosi e re ho wena: “Nyolohela kwano!” ho ena le ho tlontlollwa mahlong a kgosana, mahlong a kgosana eo o e bonang.

⁸ Se potlakele ho isa motho ka kgotla, esere mohaeno a o tlontlolla, wa qetella o se na seo o ka se etsang.

⁹ Ha o tsekisana le mohaeno buisana le yena, feela taba tsa e mong tsona e be pinyane,

¹⁰ esere ha a utlwa a o tlontlolla, botumo bo bobe bo se hlole bo o hlakoha.

¹¹ Polelo e builweng ka nako ya yona e ka apole tsa kgauta ka sejaneng sa silefera.

¹² Ho kgalengwa ke motho ya bohlale, tsebeng e lethwethwe ke lesale, ke mokgabo wa kgauta e hlwekisitsweng.

¹³ Jwaloka lehlwa le phodisang ka nako ya kotulo, leqosa le tshepahalang le jwalo ho ba-le-romi; le kgatholla pelo ya monga lona.

¹⁴ Motho ya ithorisang ka dimpho tsa molomo, o jwaloka maru le moya o se nang pula.

¹⁵ Ho ba le mamello ho ka sokolla kgosi; polelo e bonolo e fedisa manganga.

¹⁶ Ha o ntshetsa dinotshi o di je ka tekanyo; ha o ka itlopa tsona, di tla o hlatsisa.

¹⁷ Ya ahisaneng le wena o mo fapohele sewelo, esere wa mo tena, a qetella a o hloile.

¹⁸ Ya etseletsang mohahabo ka leshano ke koto kapa sabole, kapa motsu o ntjhotjho.

¹⁹ Ho tshepa molotsana nakong ya ditsietsi ho ka leino le bodileng, kapa leoto le hlotsang.

²⁰ Ho binela ya hlomohileng pina tsa thabo, ho ka ho hlobola kobo mohla ho batang, le ho tshela asene hodima leqeba.

²¹ Ha sera sa hao se lapile, o ke o se fepe; ha se nyorilwe, se fe metsi se nwe;

²² ka ho etsa jwalo o se hlabisa dihlong, mme wena Morena o tla o putsa.

²³ Jwalokaha moya wa leboya e le mmadipulana, leme le sebang le tsosa kgalefo.

²⁴ Ho molemo ho iphelela sekgutlwaneng kahodima marulelo a ntlo, ho ena le ho phela le mmadikomang.

²⁵ Taba tse monate tse tswang naheng e hole di ka metsi a phodileng mmetsong o nyorilweng.

²⁶ Motho ya lokileng, ya suthelang ya kgopo tsela, ke diba se dukehileng kapa mohlodi o silafetseng.

²⁷ Hase hantle ho itlopa dinotshi; ho ipatlela tlotla le hona ha ho lokele.

²⁸ Motho ya hlolwang ho bipa kgalefo ya hae o tshwana le motse o marako a heleditsweng.