Diproverbia 18 - BIBELE

¹ Ya iketsang mokgelo o ithata boyena, tsohle tsa bohlale o hanyetsana le tsona.

² Sethoto ha se thabele ho ba le kutlwisiso, se thabela ho pepesa mehopolo ya sona.

³ Bokgopo bo tsamaya le ho tella, dihlong di tsamaya le ho nyatseha.

⁴ Dipolelo tsa motho di ka bodiba, mohlodi wa bohlale e ka diba se runyarunyang.

⁵ Ha ho molemo ho bontsha leeme ho ba kgopo, ebe o sitisa ya lokileng ho ahlolelwa ka toka.

⁶ Leleme la sethoto le baka diqabang, polelo tsa sona di se memela ho shapuwa.

⁷ Sethoto se timetswa ke dipuo tsa sona, se tshwaswa ke leraba la polelo tsa sona.

⁸ Polelo tsa heletwane di a hlabosa, di theohela hamonate ka pelong ya motho.

⁹ Ya monyebe mosebetsing wa hae, yena ke ngwanabo sesenyi.

¹⁰ Lebitso la Morena ke qhobosheane, ya lokileng o tshabela teng, a sireletsehe.

¹¹ Matlotlo a barui ke qhobosheane ya bona, ba hloma e ka ke marako a phahameng, a ba sireletsang.

¹² Boikakaso bo etella timelo pele, boikokobetso bona bo tla pele ho tlotla.

¹³ Ya arabang a sa imamela hantle ke sethoto, o hlabisa dihlong.

¹⁴ Ya kulang o matlafatswa ke moya wa hae, moya o hlomohileng o ka phekolwa ke mang?

¹⁵ Ya nang le kutlwisiso o fumana tsebo, tsebe ya ya bohlale e lethwethwe ho mo mamela.

¹⁶ Mpho e betlela mofani tsela, e mmee kapele ho mahosi a hae.

¹⁷ Moqosi ha a bua ka kgotla e ye e ke o bua nnete, ho fihlela ha moqosuwa a mo hloma dipotso.

¹⁸ Ha laola ka lotho ho fedisa diqabang, ho namole ba matla, ba lwantshanang.

¹⁹ Ngwanabo motho ha a kgenne o thata ho feta qhobosheane, qhobosheane e matla, diphapang tsona e ka mekwallo ya qhobosheane.

²⁰ Motho o kotula seo a se jalang ka leme la hae, o kgotsofatswa ke polelo tsa molomo wa hae.

²¹ Leleme le ka phedisa, hape le ka bolaya, ba ratang ho hehla ba tla kotula tholwana tsa hona.

²² Ya inyaletseng mosadi wa sebele o lehlohonolo, ya jwalo Morena o mo hauhetse.

²³ Mofumanehi o kopa mohau ka boikokobetso, morui ha a araba o moshashabetsa ka bohale.

²⁴ Metswalle mmotwana e isa motho timelong, wa sebele yena o tshepahala ho feta ngwanabo motho.