Diproverbia 16 - BIBELE

¹ Pelo ya motho e rera merero, tseo a di buang di laolwa ke Morena.

² Ketso tsa motho di tadimeha di lokile ho yena, empa Morena o lekola sepheo sa hae.

³ Bea mesebetsi ya hao atleng tsa Morena, mme merero ya hao e tla phethahala.

⁴ Tsohle Morena o di entse ka morero wa hae, le ya kgopo tsatsi la ditlokotsi le mo emetse.

⁵ Motho ya ikgantshang, Morena o a mo nyonya, ya jwalo Morena o tla mo ahlola.

⁶ Sebe se hlakolwa ke lerato le botshepehi; ya tshabang Morena bobe o tla bo phema.

⁷ Eo metsamao ya hae e kgahlang Morena, Morena o mo phedisa ka kgotso le dira tsa hae.

⁸ Sejosenyane se molemo ha se fumanwe ka toka, ho ena le maruo a fumanwang ka bolotsana.

⁹ Motho o itherela tsela ya hae, empa ke Morena ya mo tataisang.

¹⁰ Diqeto tsa kgosi di tswa ho Modimo, ha e ahlola e ahlola ka toka.

¹¹ Tekanyo tse nepahetseng ke tsa Morena, majwe a supang boima a entswe ke yena.

¹² Kgosi di nyatsa ketso tse manyala ho loka hona ho tsitsisa mmuso.

¹³ Molomo o buang tse lokileng o thabisa dikgosi, dikgosi di rata motho ya buang nnete.

¹⁴ Kgalefo ya kgosi e tshwana le ya tlisang pehi, empa ya bohlale o kokobetsa kgalefo.

¹⁵ Ho thaba ha kgosi ho a phedisa, mohau wa yona o ka leru la pula selemo.

¹⁶ Ho fumana bohlale ho molemo ho feta kgauta, ho fumana kutlwisiso ho molemo ho feta silefera.

¹⁷ Tsela ya ba lokileng e kgeloha bobe, ya e hlokomelang o baballa bophelo ba hae.

¹⁸ Boikakaso bo etella timelo pele, boikgohomoso bo etelle ho wa, pele.

¹⁹ Ho molemo ho ikokobetsa o le hara mafutsana, ho ena le ho arolelana kgapo le baikgohomosi.

²⁰ Ya elang ditaelo hloko o a atleha, ya tshepang Morena o a hlohonolofala.

²¹ Ya bohlale ho thwe o na le kutlwisiso, polelo tse monate tsona di a kgodisa,

²² Bohlale ke diba sa bophelo ho ya nang le bona, ho ruta dithoto ke ho itshenyetsa nako.

²³ Ya bohlale o hlalefiswa ke pelo ya hae, le seo a tla se bua o se rutwa ke yona.

²⁴ Polelo tse monate di ka mahe a dinotshi, moyeng di a hlabosa, di matlafatse mmele.

²⁵ Tsela e teng e bonahalang e lokile ho monga yona, empa e qetella ka ho isa lefung.

²⁶ Sekgothadi se a itshebeletsa, se itshebeletsa ka thata, hobane se lakatsa ho ikgotsofatsa.

²⁷ Senokwane se rera bobe, molomong wa sona ho tswa tse tjhesang sa malakabe.

²⁸ Motho ya kgopo o duka kgotso, mosebi yena o qabanya metswalle, metswalle ya hlooho ya kgomo.

²⁹ Motho ya dikgoka o hohela ya ahisaneng le yena, a mo tsamaise tseleng tse sa lokang.

³⁰ Ya robang leihlo o rera bokgopo, ya petlang melomo bobe o sa bo entse.

³¹ Moriri o moputswa ke mofapahlooho o kgabane, o fumanwa ke ya phelang ka ho loka.

³² Ya nang le mamello o molemo ho feta ya dikgoka, ya itshwarang ha a halefile o feta ya hapang motse.

³³ Batho ba laola ditaba ka lotho, empa diqeto tsona ke tsa Morena.