Diproverbia 11 - BIBELE

¹ Morena o hloile sekala se qhekanyetsang, empa boima bo nepahetseng bona bo a mo thabisa.

² Boikakaso bo etella dihlong pele, boikokobetso bona bo tsamaya le bohlale.

³ Ba tshepahalang ba tataiswa ke botshepehi ba bona, ba sa tshepahaleng bona ba timela, ba timetswa ke ho se tshepahale ha bona.

⁴ Kgalefo ya Modimo e ke ke ya fediswa, ya fediswa ke maruo a motho, empa ho loka ho lopolla motho lefung.

⁵ Ho loka ha ba se nang molato ho lokisa tsela tsa bona, ba kgopo ba timetswa ke bokgopo ba bona.

⁶ Ho loka ha ba lokileng ho a ba lopolla, ba hlokang botshepehi ba tshwaswa ke ditakatso, takatso tsa bona tse mpe.

⁷ Ha ya kgopo a eshwa, tshepo ya hae e a fela, maruo ao a neng a a tshepile le wona a a fela.

⁸ Ya lokileng o pholoswa tsietseng ya hae, ebe ya kgopo yena o wela ho yona.

⁹ Polelo tsa ya kgopo di timetsa mohahabo, empa ya lokileng yena o pholoswa ke tsebo.

¹⁰ Ha ba lokileng ba atleha motse o a nyakalla, ha ba kgopo ba timela, hara motse ke medidietsane.

¹¹ Ho hlohonolofatswa ha ba lokileng ho haha motse, athe leme la ya kgopo lona le a o timetsa.

¹² Sethoto se nyedisa mohahabo sona, empa ya nang le kutlwisiso yena ke lethola.

¹³ Ya ratang ditshebo o hlahatsa makunutu, ya tshepahalang yena o na le sefuba.

¹⁴ Tjhaba se hlokang botsamaisi se a lahleha, se nang le baeletsi ba bangata se a bolokeha.

¹⁵ Ya itlamang ka molato wa motho o a itsietsa, ya hanang ho itlama o iphemisa kotsi.

¹⁶ Mosadi ya mosa o kgaba ka hlompho, banna ba dikgoka ba ikgapela maruo.

¹⁷ Monna ya mohau o iketsetsa tse molemo, athe ya sehloho yena o a itshitelwa.

¹⁸ Motho ya kgopo o amohela moputso wa bolotsana, ya jalang ho loka o kotula moputso wa nnete.

¹⁹ Motho ya lokileng o tla rua bophelo, ya pheeletseng bobe yena o tla timela.

²⁰ Morena o hloile ba pelo di kgopo, empa o thabela ba metsamao e lokileng.

²¹ Ruri ba kgopo ba tla ahlolwa, ba lokileng bona ba pheme kahlolo.

²² Mosadi ya hlokang boitshwaro leha a le motle, o jwaloka sale la kgauta nkong ya kolobe.

²³ Ya lokileng o lakatsa tse molemo, ya kgopo yena o emetswe ke kgalefo.

²⁴ E mong o fana haholo, leruo le mo atele, e mong e be lekgonatha, bofuma bo mo aparele.

²⁵ Ya fanang haholo o tla fumana katleho, ya fanang ka metsi le yena o tla a fuwa.

²⁶ Ya hanang ho rekisa koro batho ba a mo rohaka, empa ya ba rekisetsang yena o a hlohonolofala.

²⁷ Ya pheellang tse molemo o tla hauhelwa, ya pheellang bobe bo tla mo wela hodimo.

²⁸ Ya tshepang maruo a hae o tla timela, ya lokileng o atleha jwaloka hlaku le letalana.

²⁹ Ya hlorisang lapa la hae a ke ke a rua letho, sethoto se tla fetoha kgoba la ya bohlale.

³⁰ Tholwana ya ho loka ke sefate sa bophelo, ya bohlale yena o hapa meya ya batho.

³¹ Ya lokileng o tla fumana moputso a sa phela, ya kgopo le moetsadibe le bona ba tla putswa.