Dipesaleme 86 - BIBELE

Thapelo ya ho ikopela thuso

¹ Thapelo ya Davida. Morena, ako ntshekehele tsebe, o nkarabe, hobane ke hlophehile, ke futsanehile.

² Ako baballe bophelo ba ka, hobane ke motshepuwa wa hao, pholosa mohlanka wa hao ya o tshepang.

³ Ke wena Modimo wa ka, nkgauhele, Morena, ke ipiletsa ho wena kamehla.

⁴ Ako thabise mohlanka wa hao; ke o rapela ka moya wa ka wohle, Morena.

⁵ Wena Morena, o molemo, o a tshwarela; mohau wa hao o moholo ho bohle ba ipiletsang ho wena.

⁶ Morena, sekehela thapelo ya ka tsebe, o mamele sello sa thapedi ya ka.

⁷ Ha ke le matshwenyehong ke ipiletsa ho wena, mme wena o a nkaraba.

⁸ Morena, ha ho ya tshwanang le wena, ya tshwanang le wena hara medimo, ha ho mesebetsi e kang ya hao.

⁹ Tjhaba tsohle tseo o di bopileng di tla tla, di itihele maotong a hao Morena, di tlotlise lebitso la hao;

¹⁰ hobane o moholo, o etsa dimakatso, ke wena Modimo o inotshi.

¹¹ Nthute tsela ya hao Morena, ke tle ke tsamaye nneteng ya hao; tataisetsa pelo ya ka tshabong ya lebitso la hao.

¹² Morena, Modimo wa ka, ke tla o boka ka pelo ya ka yohle, ke tlotlise lebitso la hao kamehla yohle.

¹³ Ho nna mohau wa hao o moholo, ke wena ya ntopolotseng botebong ba Nqalo ya Bafu.

¹⁴ Modimo, baikakasi ba ntsohetse matla, sehlopha sa ba sehloho se batla bophelo ba ka, ha ba na taba le wena.

¹⁵ Empa wena Morena, o Modimo o na le kutlwelobohloko le mosa, o dieha ho halefa, o tletse mohau le botshepehi.

¹⁶ Ako kgutlele ho nna, o nkgauhele; matlafatsa mohlanka wa hao, o pholose mora wa lekgabunyane la hao.

¹⁷ Bonahatsa molemo wa hao ho nna, ba ntlhoileng ba hlajwe ke dihlong, ha ba bona hore wena Morena, o mothusi wa ka le motshedisi wa ka.