Dipesaleme 85 - BIBELE

Ke Modimo ya phedisang setjhaba

¹ Pesalema ya bara ba Kora, e qapetsweng motsamaisi wa dibini.

² Morena, o ile wa kgahlwa, wa kgahlwa ke lefatshe la hao, wa kgutlisa ba leloko la Jakobo, wa ba kgutlisa bothopuweng.

³ O ile wa leballa setjhaba sa hao, wa se leballa molato wa sona, wa se tshwarela dibe tsohle tsa sona.

⁴ O ile wa kokobetsa bohale bohle ba hao, wa kgutla kgalefong ya hao e tukang.

⁵ Ako boele o re kgutlise, Modimo, wena, mopholosi wa rona, o fedise kgalefo ya hao ho rona.

⁶ Na o tla nne o re halefele kamehla? Na kgalefo ya hao e ke ke ya kgaotsa ho isa melokong e tlang?

⁷ Na o ke ke wa boela wa re phedisa, setjhaba sa hao se tle se o thabele?

⁸ Morena, ako re bontshe mohau wa hao, mme o re pholose.

⁹ A nke ke utlwe seo Morena Modimo a se bolelang, hobane o tla bolella setjhaba sa hae le batshepuwa ba hae tsa kgotso, e le hore ba se ke ba kgutla, ba kgutlela bothotong ba bona.

¹⁰ Ruri ho pholosa ha hae ho haufi le ba mo tshabang, e le hore tlotla ya hae e tle e ahe fatsheng la rona.

¹¹ Mohau le botshepehi di tla kopana, ho loka le kgotso di tla akana.

¹² Botshepehi bo tla ropoha lefatsheng, ho loka ho tla theoha lehodimong.

¹³ Morena o tla fana ka tse molemo, fatshe la rona le be le tjhai e kgolo.

¹⁴ Ho loka ho tla mo etella pele, kgotso e fumanwe mehlaleng ya hae.