Dipesaleme 80 - BIBELE

Setjhaba se rapella ho tsoswa hape

¹ Pesalema ya Asafo, ya bopaki. Taelo ho motsamaisi wa dibini: E binwe ka mmino wa sefela sa “Mehaladitwe”.

² Oho, modisa wa Iseraele, ako re sekehele tsebe; wena ya tsamaisang leloko la Josefa, ya le tsamaisang jwaloka mohlape, wena ya dutseng hodima dikerubime,

³ ako iponahatse ho Efraime, le ho Benjamine, le ho Manase. Bontsha matla a hao, o re pholose.

⁴ Oho, Modimo, ako boele o re tsose, o re bontshe sefahleho se kganyang kgotso, re tle re pholohe.

⁵ Morena, Modimo wa mabotho, o tla re halefela ho fihlela neng, rona tjhaba sa hao se o rapelang?

⁶ O se phedisa ka dikgapha jwalokaha eka ke bohobe, o se nwesa meokgo e mengata.

⁷ O re entse sesosa sa ditsekisano tsa bao re ahisaneng le bona, dira tsa rona di a re soma.

⁸ Oho, Modimo wa mabotho, ako boele o re tsose, o re bontshe sefahleho se kganyang kgotso, re tle re pholohe.

⁹ O ile wa hlomola morara Egepeta, wa tla o hloma moo, moo o lelekileng ditjhaba teng.

¹⁰ O ile wa o lokisetsa mobu, metso ya teba, yaba wona o tlala naha.

¹¹ Moriti wa wona wa kwahela dithaba, mahlaku a kwahela difate, fate tsa dikedare tse telelehadi.

¹² Makala a wona a nama, a nama ho ya fihla Lewatleng, mahlomela a ya fihla Nokeng.

¹³ Keng ha o dihile metero ya wona, hore o tle o ikgellwe ke mofetakatsela,

¹⁴ o tle o fatakwe ke kolobemoru, o jewe ke batana tsa naha?

¹⁵ Oho, Modimo wa mabotho, ako boele o kgutle; ako tadime o le mahodimong, o bone, o hlokomele morara ona.

¹⁶ Sireletsa se hlomilweng ke tsoho la hao le letona, mora eo o ikgodiseditseng yena.

¹⁷ Ba o tjhesitseng ka mollo, ba o remileng, ba ke ba timetswe ke kgalefo, kgalefo ya fahleho sa hao.

¹⁸ Tsoho la hao le ke le be hodima mokgethwa wa hao, mora eo o ikgodiseditseng yena.

¹⁹ Jwale ha re sa tla hlola re o furalla, ako boele o re phedise, re tle re rapele lebitso la hao.

²⁰ Oho, Morena, Modimo wa mabotho, ako boele o re tsose, o re bontshe sefahleho se kganyang kgotso, re tle re pholohe.