Dipesaleme 79 - BIBELE

Ho senngwa ha Jerusalema le ha Tempele

¹ Pesalema ya Asafo. Morena, baditjhaba ba kene, ba kene hara lefa la hao, ba silafaditse Tempele, Tempele ya hao e halalelang, ba fetotse Jerusalema lesupi.

² Ditopo tsa bahlanka ba hao ba di abetse nonyana tse fofang, ditopo tsa batshepuwa ba hao ba di abetse batana tsa naha.

³ Ba tsholotse madi a bona jwaloka metsi hohle Jerusalema, mme ha ho ya ba epelang.

⁴ Re sekgobo ho bao re ahisaneng le bona, re pale le sesomo ho ba re potapotileng.

⁵ Morena, o tla re halefela ho fihlela neng? Lefufa la hao le tla nne le tuke, le tuke jwaloka mollo ho fihlela neng?

⁶ Theolela kgalefo ya hao hodima baditjhaba, baditjhaba bana ba sa o tsebeng, le hodima mebuso ena, mebuso e sa rapeleng lebitso la hao;

⁷ hobane di metsitse leloko la Jakobo, di fetotse leaho la lona lesupi.

⁸ O se ke wa re balla melato, melato ya bo-ntata rona, o mpe o re kgahlanyetse kapele, o re kgahlanyetse ka lerato la hao, hobane re nyenyefaditswe haholo.

⁹ Ako re thuse, Modimo, wena mopholosi wa rona, bitso la hao le tle le tlotliswe; ako re namolele, mme o re tshwarele dibe ka baka la lebitso la hao.

¹⁰ Ke hobaneng ha baditjhaba ba tla re: “O kae Modimo wa bona?” A re ke re bone ka mahlo a rona ha o phetetsa madi a bahlanka ba hao, madi a tsholotsweng ke baditjhaba.

¹¹ Mefehelo ya batshwaruwa e ke e finyelle ho wena, ka matla a letsoho la hao ako pholose ba ahloletsweng lefu.

¹² Morena, bao re ahisaneng le bona o ke o ba buseletse hasupa dinyefolo tseo ba o nyefotseng ka tsona.

¹³ Empa rona setjhaba sa hao, mohlape wa makgulo a hao, re tla o boka kamehla, re phetele meloko yohle dithoko tsa hao.