Dipesaleme 51 - BIBELE

Thapelo ya moetsadibe ya bakileng

¹ Pesalema e qapetsweng motsamaisi wa dibini. Ke ya Davida,

² mohla moporofeta Nathane a tlileng ho yena, hoba Davida a etse bohlola le Batesheba.

³ Oho, Modimo, ako nkgauhele ka mohau wa hao, ho ya ka boholo ba lerato la hao ako hlakole melato ya ka.

⁴ Ntlhatswisise bokgopo ba ka, o ntlhwekise sebe sa ka;

⁵ hobane ke tseba melato ya ka, ke hopola sebe sa ka kamehla.

⁶ Ke sitetswe wena, wena o inotshi, ke entse bobe mahlong a hao. Ho loka ha hao ho tla bonahala ha o ahlola, le ho hloka kodi ha hao ha o diha nyewe.

⁷ Ruri ke bile ya sa lokang ho tloha tswalong ya ka, ke bile moetsadibe ho tloha popelong ya mme.

⁸ Athe wena o thabela botshepehi, botshepehi moyeng wa motho, o nthuta bohlale botebong ba pelo ya ka.

⁹ Fedisa sebe sa ka, ke tle ke hlweke; o ntlhatswe, ke tle ke be mosweu, ke be mosweu ho feta lehlwa.

¹⁰ Etsa hore ke utlwe mehoo ya thabo, ke utlwe le mehoo ya nyakallo, ditho tsa ka di tle di hlasimolohe, ditho tseo o di robileng.

¹¹ Nteballe dibe tsa ka, o hlakole melato ya ka kaofela.

¹² Oho, Modimo, ako bope ka ho nna, o bope pelo e hlwekileng, o kenye moya o motjha, o tiileng, o o kenye ka sefubeng sa ka.

¹³ O se ke wa ntelekela hole le wena, wa nkamoha Moya wa hao, Moya o Halalelang.

¹⁴ Ako mpuseletse nyakallo, nyakallo ya ho pholoswa ke wena, o mmatlafatse ka moya wa boitelo.

¹⁵ Ba etsang diphoso ke tla ba ruta, ke ba rute ditsela tsa hao, mme baetsadibe ba tla kgutlela ho wena.

¹⁶ Modimo, Modimo ya mpholosang, ako ntopolle kahlolong ya lefu, leme la ka le tumise ho loka ha hao.

¹⁷ Oho, Morena, ako rarolle leleme la ka, molomo wa ka o phatlalatse thoriso ya hao.

¹⁸ Ha o kgahlwe ke mahlabelo; leha nka o nyehella ka setjheso, o ke ke wa se amohela.

¹⁹ Sehlabelo se ratwang ke Modimo: ke moya o swabileng; ke pelo e swabileng, e hlomohileng; oho, Modimo, o ke ke wa e kgesa.

²⁰ Haeba o ka kgahlwa, ako etsetse Sione molemo, o tsose marako a Jerusalema.

²¹ Ke moo o tla kgahliswa ke mahlabelo a lokelang, ditjheso le dinyehelo tse tjheswang; mme ho tla nyehelwa ka dipohwana, ho nyehelwe ka tsona aletareng ya hao.