Dipesaleme 35 - BIBELE

Thapelo ya ho ikopela thuso

¹ Pesalema ya Davida. Morena, ako lwantshe ba ntwantshang, o futuhele ba mphutuhelang.

² Tshwara thebe le thejana, o eme, o nthusetse.

³ Nka lerumo le kwakwa, o thibe ba ntlhorisang. Ere ho nna: “Ke nna pholoho ya hao.”

⁴ Bao ba batlang bophelo ba ka, ba ke ba hlajwe ke dihlong, ba tlontlolohe; bao ba ntherelang bobe, ba ke ba tjhetjhe, ba ferekane.

⁵ Ba ke ba tshwane le mmoko, mmoko o fefolwang ke moya, ha lengeloi la Morena le ba kgarametsa.

⁶ Tsela ya bona e ke e fifale, e thelle, ha lengeloi la Morena le ba lelekisa.

⁷ Ba ntjhehile ka leraba ntle ho lebaka, ba ntjheketse lemena ntle ho lebaka.

⁸ Tlokotsi e ke e ba wele hodimo, e ba wele ka tsometso; ba ke ba tshwaswe ke leraba leo ba le tjhehileng, ba wele lemeneng leo ba le tjhekileng.

⁹ Jwale nna ke tla thabela Morena, ke nyakallele ho pholoswa ke yena.

¹⁰ Masapo a ka wohle a tla re: “Morena, ke mang ya kang wena, wena molopolli wa mohlophehi ho ya mo fetang ka matla, le wa mohlophehi le mofutsana, ho ya mo tlatlapang?”

¹¹ Dipaki tse kgopo di eme lepaketla, di mpotsa taba tseo ke sa di tsebeng.

¹² Batho ba mputsa ka bobe bakeng sa botle, moya wa ka o qetwa ke bodutu.

¹³ Empa ha ba ne ba kula, nna ke ile ka apara tse mahwashe, ka itlhokofatsa ka ho itima dijo, ka ba rapella ke sa kgaotse,

¹⁴ jwalokaha eka ke rapella motswalle, kapa ke rapella ngwaneso. Ka tsamaya ke iname, ke hlomohile, jwaloka ya llelang mmae.

¹⁵ Ha ke ewa, ba a thaba, ba a mpokanela; ba mpokanele ka mokgwa wa tsometso, ba nkotle ba sa kgaotse.

¹⁶ Baphoqi ha ba phetse ho ntshoma, ba ntsikitlanyetsa meno.

¹⁷ Morena, o tla shebella hoo ho fihlela neng? Pholosa bophelo ba ka bataneng tse purumang; ke bona feela, bo pholose taung tsena.

¹⁸ Ke tla o boka phuthehong e kgolo, e o rorise hara letshwelehadi.

¹⁹ Ba itshemmeng bora ho nna ba se ithabise ka nna, ba ntlhoileng ntle ho lebaka ba se nnyemotse;

²⁰ hobane ha ba bue tsa kgotso, empa batho ba kgotso, ba fatshe lena, ba ba lohela mano.

²¹ Ba nkahlamiseditse melomo, ba re: “Aha! Aha! Re o bone!”

²² Ke wena Morena, ya boneng; se kgutse! Morena, o se ke wa ba hole le nna.

²³ Phaphama, tsoha, o nkahlolele, lokisa nyewe ya ka, Modimo wa ka, Morena wa ka.

²⁴ Nkahlolele ho ya ka toka ya hao, Morena Modimo wa ka, batho bao ba tle ba se ke ba ithabisa ka nna.

²⁵ Ka dipelong tsa bona ba se re: “Aha! Re mo fumane!” Hape ba se re: “Re mo metsitse!”

²⁶ Bao ba thabelang bobe ho nna ba ke ba hlajwe ke dihlong, ba ferekane mmoho; bao ba iphahamisetsang nna ba ke ba aparelwe ke dihlong, ba tlontlolohe.

²⁷ Ba kgahlwang ke ho loka ha ka ba ke ba thabe, ba etse ditlatse; kamehla ba re: “Morena o moholo, yena ya kgahlwang ke kgotso, kgotso ya mohlanka wa hae!”

²⁸ Leleme la ka le tla bolela ho loka ha hao, le o rorise ka matsatsi wohle.