Dipesaleme 34 - BIBELE

Lehlohonolo la ya lokileng le bomadimabe ba ya kgopo

¹ Pesalema ya Davida; mohla a itlhantshang kapele ho Abimeleke; eo a mo tebela, yaba Davida o a itsamaela.

² Ke tla boka Morena ka nako tsohle, ke nne ke mo rorise kamehla.

³ Ke ithorisa ka Morena, ba eisehang ba ke ba utlwe, mme ba thabe.

⁴ A re tlotliseng Morena re le mmoho, a re phafeng lebitso la hae, re le phafe hammoho.

⁵ Ke ile ka batla Morena, mme a nkaraba, a ntopolla matswalong wohle a ka.

⁶ Ba tadimang ho yena ba kganya kgotso, mahlong a bona dihlong ha di yo.

⁷ Motho wa batho ha a ipiletsa ho Morena, Morena o a mo utlwa, o mo pholosa matshwenyehong wohle a hae.

⁸ Lengeloi la Morena le sireletsa kamahohle ba mo tshabang, mme le a ba namolela.

⁹ Latswang, le utlwe molemo wa Morena! Ho lehlohonolo motho ya tshabelang ho yena.

¹⁰ Tshabang Morena, lona bahalaledi ba hae, hobane ba mo tshabang ha ba hloke letho.

¹¹ Leha barui ba ka futsaneha, ba lapa, ba batlang Morena ba ke ke ba hloka, ba ke ke ba hloka letho le molemo.

¹² Tloong, bana ba ka, le mmamele, ke tla le ruta ho tshaba Morena.

¹³ Ke mang wa lona ya lakatsang ho phela, ya ratang ho bona matsatsi a thabo?

¹⁴ Tshwara leleme la hao le se bue tse mpe, le molomo wa hao o se bue leshano.

¹⁵ Furalla bobe, o etse botle; batla kgotso, o e pheelle.

¹⁶ Morena o beile leihlo la hae ho ba lokileng, o sekehetse sello sa bona tsebe.

¹⁷ Sefahleho sa Morena se sosobane, se sosobanetse ba etsang bobe, hore a ba hlakole lefatsheng, ba se hlole ba hopolwa.

¹⁸ Ha ba lokileng ba lla, Morena o a ba utlwa; o ba lopolla matshwenyehong wohle a bona.

¹⁹ Morena o haufi le ba feletsweng ke tshepo, o pholosa ba meya e tetebetseng.

²⁰ Mahlomola a ya lokileng a mangata, empa Morena o mo lopolla ho wona wohle.

²¹ O baballa masapo wohle a hae, ha ho le le leng la wona le tla robeha.

²² Bobe bo tla timetsa ya kgopo, ba hloileng ya lokileng ba tla ahlolwa.

²³ Morena o lopolla bophelo ba bahlanka ba hae; ho ba tshabelang ho yena, ha ho le ya mong ya tla ahlolwa.