Dipesaleme 26 - BIBELE

Thapelo ya ya se nang molato

¹ Pesalema ya Davida. Nkahlolele Morena; metsamao ya ka ha e na kodi, ke a o tshepa, ha ke thekesele.

² Ntlhahlobe, Morena, o nonye maikutlo a ka, hlahlobisisa moya wa ka le pelo ya ka.

³ Ke hopola mohau wa hao kamehla, ke phela ho ya ka nnete ya hao.

⁴ Ha ke ahisane le batho ba leshano, ha ke kopane le baikaketsi.

⁵ Ke hloile mokgatlo wa ba etsang bobe, nke ke ka ahisana le ba kgopo.

⁶ Ke hlapa matsoho ho bontsha hore ha ke na molato, ke potapota aletare ya hao Morena,

⁷ ke ntse ke bina sefela sa teboho, mme ke bolela dimakatso tsa hao.

⁸ Morena, ke rata ntlo eo o ahileng ho yona, e leng sebaka seo tlotla ya hao e dulang ho sona.

⁹ O se ke wa ntimetsa mmoho le baetsadibe, wa fedisa bophelo ba ka mmoho le ba bona, bona ba ratang ho tsholla madi,

¹⁰ bao matsoho a bona a etsang tsa bolotsana, bao diatla tsa bona di amohelang tjotjo.

¹¹ Ha e le nna, metsamao ya ka ha e na kodi; ako ntopolle, o nkgauhele.

¹² Maoto a ka a eme motsitseng; Morena, ke tla o boka diphuthehong.