Dipesaleme 2 - BIBELE

Motlotsuwa wa Modimo

¹ Moferefere ke wa eng hara ditjhaba? Matjhaba a rerelang ntho tsa mafeela?

² Dikgosi tsa lefatshe di eme ka maoto; babusi, ba le mmoho, ba rera Morena le Motlotsuwa wa hae, ba re:

³ “A re itokolleng ditlamong tsa bona, re lahleng joko ya bona.”

⁴ Ya dutseng teroneng, lehodimong, o a ba tsheha, Morena o a ba soma.

⁵ Jwale o bua le bona ka kgalefo, ka bohale ba hae o a ba tshosa, o re:

⁶ “Thabeng ya ka e halalelang, thabeng ya Sione, nna ke beile kgosi ya ka.”

⁷ Yona e re: “A nke ke phatlalatse taelo ya Morena. “O itse ho nna: ‘O mora wa ka; kajeno ke o tswetse.

⁸ Nkope, ke tla o nea ditjhaba e be lefa la hao, le lefatshe ka bophara ba lona e be leruo la hao.

⁹ O tla di busa ka lere la tshepe, o di pshatle jwaloka nkgo ya letsopa.’ ”

¹⁰ Jwale he, halefang, lona dikgosi; eletsehang, lona babusi ba lefatshe.

¹¹ Sebeletsang Morena ka tshabo, le itihele maotong a hae ka thothomelo.

¹² Ho seng jwalo o tla halefa, mme le timelle tseleng ya lona, hobane kgalefo ya hae e phakisa ho tuka. Ho lehlohonolo bohle ba tshabelang ho yena.