Dipesaleme 144 - BIBELE

Modimo ke mohlodi wa tlholo le katleho

¹ Pesalema ya Davida. Ho bokwe Morena, lefika la ka, yena ya nthutang ho lwana, yena ya nkwetlisetsang ntwa.

² Ke setshabelo sa ka le qhobosheane ya ka, seqhobo sa ka le monamoledi wa ka; ke thebe ya ka, eo ke itshireletsang ka yona, ke yena ya beang ditjhaba katlasa puso ya ka.

³ Morena, ebe motho e ne e le eng, hoo o ka mo nkelang hloohong? Ngwana motho e ne e le eng, hoo o ka mo hopolang?

⁴ Motho o tshwana le lefeela, ditshiu tsa hae di jwaloka moriti o fetang.

⁵ Morena, phetla mahodimo a hao, o theohe, o ame dithaba di tle di foqohe mosi.

⁶ Betsa mahadima, dira di tle di qhalane, o fule ka metsu ya hao, di tle di phasaphase.

⁷ Nnanabele o le hodimo, o mpholose, o nkinole metsing a lewatle, le matsohong a baditjhaba;

⁸ ba buang mashano ka melomo ya bona, ba phahamisang matsoho ho hlapanyetsa bohata.

⁹ Modimo, ke tla o binela, ke o binele sefela se setjha, ke o roke ka harepa e kgwele di leshome,

¹⁰ wena ya neang dikgosi tlholo, wena ya pholosang Davida, mohlanka wa hao.

¹¹ Mpholose saboleng e sehloho, namolele matsohong a baditjhaba ba buang mashano ka melomo ya bona, ba phahamisang matsoho ho hlapanyetsa bohata.

¹² Bara ba rona, botjheng ba bona, ba ke ba be jwaloka ditlama, tlama tse holang hantle; baradi ba rona ba be jwaloka ditshiya, tshiya tsa dihuku tse betletsweng ntlo ya bokgosi.

¹³ Mediko ya rona e ke e tlale, e tsholohe dijo tsa mefutafuta. Manku a rona a ke a ate ka dikete, e be diketekete makgulong a rona;

¹⁴ makgomo a rona a ke a emare, a se folotse kapa a shwelwa ke manamane, ho se be diboko mabaleng a motse.

¹⁵ Ho lehlohonolo setjhaba se tlelwang ke tse jwalo, ho lehlohonolo setjhaba seo Morena e leng Modimo wa sona.