Dipesaleme 109 - BIBELE

Moqosuwa o ipiletsa ho Modimo

¹ Pesalema ya Davida, e qapetsweng motsamaisi wa dibini. Modimo, wena eo ke o rorisang, o se ke wa kgutsa,

² hobane ba kgopo le ba leshano ba ahlamisitse melomo ho ntwantsha. Ba bua le nna ka maleme a thetsang,

³ ba nteela hare ka dipuo tsa lehloyo, ba mphutuhela ntle ho lebaka.

⁴ Ba mpuseletsa lerato la ka, ba mpuseletsa lona ka ho nqosa, leha ke ntse ke ba rapella.

⁵ Ba mputsa ka bobe bakeng sa botle, le lehloyo bakeng sa lerato.

⁶ Ako bee ya kgopo ho ahlola motho eo, moqosi wa hae a nne a eme ka hlakoreng la hae le letona.

⁷ Ha a ahlolwa a ke a fumanwe a le molato, thapedi ya hae e nkuwe e le sebe.

⁸ Ditshiu tsa hae di ke di kgutsufale, e mong a ke a nke mosebetsi wa hae.

⁹ Bana ba hae e ke be dikgutsana, le mosadi wa hae e be mohlolohadi.

¹⁰ Bana ba hae ba lelere, e be mekopakopa, ba lelekwe thakong tsa habo bona.

¹¹ Moadimani a ke a mo amohe sohle seo a nang le sona; batho basele ba ikgapele tholwana tsa mofufutso wa hae.

¹² Ho se be motho ya mo hauhelang, kapa ya thusang dikgutsana tsa hae.

¹³ Ditloholo tsa hae di ke di timetswe, mabitso a tsona a hlakolwe melokong e hlahlamang.

¹⁴ Molato wa bo-ntatae o nne o hopolwe ke Morena, sebe sa mmae se se ke sa hlakolwa;

¹⁵ Morena a nne a di hopole kamehla, a ba hlakole lefatsheng, hore ba se hlole ba hopolwa.

¹⁶ Motho eo ha a a ka a hopola, a hopola ho ba mohau, empa a hlorisa mohlophehi, a hlorisa le mofutsana, a tle a bolaye ya tepeletseng pelo.

¹⁷ A rata ho rohakana: Thohako e ke be hodima hae! Ha a ka a thabela tlhohonolofatso: E ke be hole le yena!

¹⁸ A apara thohako jwaloka kobo: E ke e monyele mmeleng wa hae, e monyele jwaloka metsi, le masapong a hae jwaloka ole.

¹⁹ E ke be jwaloka seaparo seo a ipopileng ka sona, e be jwaloka leqhama leo a itlamileng ka lona kamehla.

²⁰ Morena a ke a putse baqosi ba ka jwalo, batho bana ba mpuang hampe.

²¹ Empa wena Morena, Morena ka, ako nthusetse ka baka la lebitso la hao, o nnamolele ka baka la mohau wa hao o molemo.

²² Ke mohlophehi, ke mofutsana, pelo ya ka e thulame ka sefubeng sa ka.

²³ Ke ikela jwaloka meriti e theang, ke fefolwa jwaloka tsie.

²⁴ Mangwele a ka a tsherema, a tsherema ke ho itima dijo, mmele wa ka o otile ke ho hloka mafura.

²⁵ Ke fetohile sekgobo ho baqosi ba ka, ha ba mpona ba ntshisinyetsa dihlooho.

²⁶ Ako nthuse, Morena, Modimo wa ka, o mpholose ka mohau wa hao,

²⁷ ba tle ba tsebe hore hona ho entswe ke wena, ke mosebetsi wa matsoho a hao, matsoho a hao wena Morena.

²⁸ Bona ba a rohakana, empa wena o a hlohonolofatsa; ba ntsohelang matla ba ke ba hlajwe ke dihlong, mohlanka wa hao yena a ke a thabe.

²⁹ Baqosi ba ka ba aparelwe ke dihlong, tlontlollo e be jwaloka seaparo seo ba ipopileng ka sona.

³⁰ Ke tla boka Morena ka lentswe le phefa, ke mo rorise ke le hara matshwele;

³¹ hobane o eme ka hlakoreng le letona hlakoreng le letona la mofutsana, hore a tle a mo pholose ho ba mo ahlolang.