Dipesaleme 104 - BIBELE

Ho boka Modimo, Mmopi wa tsohle

¹ Boka Morena, wena moya wa ka. Morena Modimo wa ka, o moholo hakaakang! O apere tlotla le botlotlehi,

² o ipopile ka lesedi jwalokaha eka ke kobo. O adile mahodimo jwaloka lesela la tente,

³ o hahile ntlo ya bokgosi ba hao kahodimo ho maru. Maru o a entse kariki ya hao, o fofa ka mapheo a moya.

⁴ Meya o e entse baromuwa ba hao, mollo wa lehadima mosebeletsi wa hao.

⁵ O tiisitse lefatshe hodima metheo ya lona, le ke ke la sisinyeha ho isa kgale.

⁶ O le apesitse ka lewatle jwalokaha eka ke ka kobo, metsi a ne a kwahetse dithaba.

⁷ Yare ha o kgaruma, metsi a baleha; ha letolo la hao le thwathwaretsa, a tutumolotseha;

⁸ a theohela dikgohlong, dithaba tsa hlaha, a ya moo o a lokiseditseng teng.

⁹ Wa a sehela moedi oo a ke keng a o tlola, hore a se hlole a kwahela lefatshe hape.

¹⁰ Wa phallisetsa didiba dinokaneng tse tswedipanang hara dithaba;

¹¹ metsi a tsona a nowa ke phoofolo tsa naha, tonki tsa naha di itlosa lenyora teng.

¹² Nonyana tse fofang di hahetse pela tsona, di letsa melodi di le makaleng a difate.

¹³ O nesetsa dithaba pula o le tlung ya bokgosi ba hao, lefatshe le kgotshe ditholwana, tholwana tsa mesebetsi ya hao.

¹⁴ O medisetsa diphoofolo jwang, o di medisetsa le dimela hore di sebediswe ke motho, a tle a fumane dijo tsa hae mobung,

¹⁵ le veine, ho thabisa pelo ya motho; le ole, fahleho sa hae se be moropotsana, le dijo, ho matlafatsa mmele wa hae.

¹⁶ Difate tsa Morena di nwesetswa ke pula, dikedare tsa Lebanone tse lemilweng ke yena.

¹⁷ Dinonyana di etsa dihlaha ho tsona, mekotatsie e phela hodima difate.

¹⁸ Thabeng tse telele ho phela podi tsa naha, diqhobo ke setshabelo sa dipela.

¹⁹ O entse kgwedi ho tshwaya dinako tsa selemo, letsatsi le tseba nako ya lona nako ya ho dikela.

²⁰ O tlisa lefifi, ebe e ba bosiu, dibatana tsa meru ebe di a solla;

²¹ ditawana di purumele diphofu tsa tsona, di batle dijo tsa tsona ho Modimo.

²² Ha tsatsi le tjhaba di a oroha, ebe di botha dilaong tsa tsona.

²³ Motho yena o ikela mosebetsing wa hae, a yo sebetsa ho fihlela mantsiboya.

²⁴ Morena, mesebetsi ya hao e mengata hakaakang! Tsohle o di entse ka bohlale, lefatshe le tletse dibopuwa tsa hao!

²⁵ Ke leo lewatle, le leholo, le batsi; ka ho lona ho nyeunya dibopuwa, dibopuwa tse se nang palo, dibopuwa tse kgolo le tse nyenyane.

²⁶ Teng dikepe di sesa kahohle, le leruarua leo o le bopetseng ho bapalla ka ho lona.

²⁷ Tsohle di lebeletse wena, hore o di fe dijo ka nako e lokelang.

²⁸ Ha o di fa dijo, di a di bokella; ha o fuparolla seatla, di kgora tse molemo.

²⁹ Ha o ipata sefahleho, di a tshoha; ha o di amoha moya wa hao, di a shwa, di boele di kgutlele leroleng.

³⁰ Ha o romela moya wa hao, di a hloleha, mme o ntjhafatse tshobotsi ya lefatshe.

³¹ Tlotla ya Morena e nne e be teng, e be teng kamehla yohle, Morena a ke a thabele mesebetsi ya hae;

³² yena eo ereng ha a tadima lefatshe, lefatshe le thothomele, ha a ama dithaba di foqohe mosi.

³³ Ke tla binela Morena ha ke ntse ke phela, ke roke Modimo bophelong ba ka bohle.

³⁴ Menahano ya ka e ke e mo kgahle; nna ke thabela Morena.

³⁵ Baetsadibe ba ke ba fele lefatsheng, ba kgopo ba se hlole ba eba teng. Boka Morena, wena moya wa ka. Haleluja!