Deuteronoma 32 - BIBELE

Sefela sa Moshe

¹ “Sekehang tsebe, lona mahodimo, mme ke tla bua; lefatshe le ke le utlwe polelo tsa molomo wa ka.

² Thuto tsa ka di tla rotha jwaloka pula, polelo tsa ka di monyele jwaloka phoka, jwaloka lefafatsane hodima jwang bo botalana, le jwaloka modupe hodima dijalo.

³ “Ke tla phatlalatsa lebitso la Morena; lona le thoholetse boholo ba Modimo wa rona.

⁴ “Yena ke Lefika, mosebetsi wa hae o hloka kodi, ditsela tsohle tsa hae di na le toka; ke Modimo ya tshepahalang, ya se nang bokgopo; o lokile, mme o nepa kamehla.

⁵ “Ba itshilafaditse, ha e sa le bana ba hae, ba dikodi, ke moloko o kgelohang, o kgopo.

⁶ Le buseletsa Morena ka mokgwa o tjee, lona tjhaba sa dithoto, tjhaba sa ditseketseke? Na hase yena Ntata lona le Mmopi wa lona? O le bopile, a le etsa setjhaba.

⁷ “Hopolang mehla ya kgalekgale, nahanang mengwaha ya meloko ya pele, botsang bo-ntata lona, mme ba tla le jwetsa, baholo ba lona ba tla le bolella.

⁸ Ha Radiphahama a aba, a abela matjhaba dinaha, a arola bana ka merabe ya bona, a na a sehela ditjhaba meedi, ho ya ka palo ya bana ba Iseraele.

⁹ Seabo sa Morena ke setjhaba sa hae, Jakobo ke karolo ya lefa la hae.

¹⁰ “A na a mo fumana a lelera lehwatateng, feelleng le bodutu la dipukupuku; a mo sireletsa, a mo baballa, a mo hlokomela seka thaka ya leihlo.

¹¹ Jwaloka ntsu e phaphamisa madinyane a yona, e a okaokela, e thathalatsa mapheo, e hloibile madinyane a yona, e a jara ka mapheo a yona,

¹² Morena a mo tataisa a le inotshi, a sa thuswe ke medimo e meng.

¹³ “A mo etsa mmusi wa phahama tsa lefatshe, a phela ka ho ja mabehwa-ke-naha; a mo momontsha mahe a dinotshi a etswa lefikeng, a mo fa ole e etswa fikeng la moralla;

¹⁴ sereledi ya eba sa serema sa kgomo, lebese ya eba le mafura la dinku, mafura ya eba a dikonyana, dipheleu le dipodi ya eba tsa Bashane, koro ya eba e lefi le thata, a nwa lero la morara le lefubedu.

¹⁵ “Jakobo a ja, a kgora, Jeshurune a nona, a ba a penya, a lahla Modimo e le Mmopi wa hae, a nyedisa Fika le mo pholositse.

¹⁶ Ba mo phephetsa ka medimo e meng, ba mo halefisa ka manyala a medingwana.

¹⁷ Ba etsa mahlabelo, ba a etsetsa bademona, e seng Modimo, ba hlabela medimo eo ba sa kang ba e tseba, ba hlabela medimo e metjha, medimo eo bo-ntata bona ba sa kang ba e tshaba.

¹⁸ Ha le a tsotella Fika le le emotse, le lebetse Modimo, Mmopi wa lona.

¹⁹ “Morena a bona hona, mme a ba nyonya, a lahla bara le baradi ba hae.

²⁰ ‘Ke tla ba patela fahleho sa ka,’ ha rialo Morena, ‘ke bone na ba tla fella kae; ke moloko o kgelohileng, wa bana ba hlokang botshepehi.

²¹ Ba mphepheditse ka hoo e seng Modimo, ba nkgalefisa ka medimo ya mafeela; ke tla ba phephetsa ka bao e seng setjhaba, ke ba halefise ka tjhaba se hloka kelello.

²² Kgalefo ya ka e tuka malakabe, e tlokoma ho ya fihla Nqalong ya Bafu, e timetsa lefatshe le tsa lona, e tjhesa le metheo ya dithaba.

²³ “ ‘Ke tla ba dihela bomadimabe hodimo, metsu ya seqha sa ka e felle hodima bona.

²⁴ Sekoboto, feberu le sewa di tla ba qeta, ke romele dibatana di ba harole, le mahloko a dihahabi tsa lefatshe.

²⁵ Sabole e tla ja bana mabaleng, e timetse ngwana le moshanyana, lesea le leqheku ka ho tshwana, ka matlung teng ho buse tshabo.

²⁶ Ke ne ke itse ke tla ba hasanya, bitso la bona le fediswe hara batho,

²⁷ hoja ha ke tswafe ho thabisa sera, sa tshoha se ithorisa, se re: Ke ka matsoho a rona re ba hlotseng, hase Morena ya entseng tsena tsohle.’

²⁸ “Ke tjhaba se hlokang kelello, kutlwisiso ha e yo ho sona.

²⁹ Ha se ne se le bohlale, se utlwisisa, se ne se tla lemoha pheletso ya sona.

³⁰ Motho a ka phaladisa sekete a le inotshi? Ba babedi ba lelekisa di le leshome, Fika la bona le sa ba rekisa, Morena a sa neelana ka bona?

³¹ ‘Fika’ la bona ha e ke Fika la rona, le dira tsa rona di ka re pakela.

³² Ke makala a morara wa Sodoma, a kgethutswe masimong a Gomora; morara wa yona o tletse mahloko, masihla a yona a a baba ha a jewe.

³³ Veine ya teng ke tjhefo ya dihahabi, ke mahloko a bohale a bo-marabe.

³⁴ “Na tsee ha di a bolokwa sesiung sa ka, tsa bitiellwa letloleng la ka?

³⁵ Phetetso le puseletso ke tsa ka, mohla maoto a bona a kgetshemelang; tsatsi la tlokotsi ya bona le atametse, timelo ya bona e potlakile.

³⁶ “Morena o tla ahlola, a ahlolele tjhaba sa hae, a utlwele bahlanka ba hae bohloko, ha a bona matla a bona a fedile, a sa siye mothopuwa kapa molokolohi.

³⁷ O tla botsa: ‘E kae medimo ela ya bona, “lefika” leo ba tshabetseng ho lona;

³⁸ medimo e jeleng mafura a mahlabelo a lona, e nweleng veine ya dinyehelo tsa lona? Medimo eo a e tsohe e le thusetse, medimo ya lona e le sireletse.

³⁹ “ ‘Bona, ke nna eo e ntseng e le yena, ha ho Modimo e mong. Ke a timetsa, ke a phedisa, ke a hlatha, ke a fodisa, ha ho ya ka namolelwang matsohong a ka.

⁴⁰ Ke supa hodimo, ke a ikana, nna ya phelang kamehla ke a hlapanya:

⁴¹ Ke tla leotsa sabole ya ka ya lebenyane, ke tshware kahlolo ka letsohong la ka, ke iphetetse ho dira tsa ka, ba ntlhoileng ke ba buseletse.

⁴² Metsu ya ka e tla rotha madi a bona, sabole ya ka e tla kganathela dinama, e tlale madi a babolauwa le bathopuwa, e ebole mahata a ba direng.’

⁴³ “Lona mahodimo thoholetsang le yena; o phetetsa madi a bahlanka ba hae, o buseletsa ba mo hloileng. O tshwarelwa tjhaba sa hae le naha ya sona.”

⁴⁴ Jwale Moshe, a ena le Joshua mora wa Nune, a tla, a phetela setjhaba mantswe wohle a sefela sena.

Boipiletso ba Moshe ba ho qetela

⁴⁵ Ha Moshe a qetile ho phetela Baiseraele mantswe ana wohle a sefela sena,

⁴⁶ a re ho bona: “Bolokang mantswe ana wohle ao ke le boleletseng wona kajeno, le laele bana ba lona ho a hlokomela, le ho phetha dipallo tsa Molao ona.

⁴⁷ Ho lona hase mantswe a lefeela; ke bophelo ba lona. Ka mantswe ana le tla phela halelele naheng eo le tshelang Jorodane ho ya ho yona, hore e be ya lona.”

Moshe o bontshwa naha ya Kanana

⁴⁸ Ka lona letsatsi leo Morena a bua ho Moshe, a re:

⁴⁹ “Nyolohela dithabeng tsena tsa Abarime, o hlwelle hodima thaba ya Nebo, e naheng ya Moabe, e malebana le Jeriko, o tadime naha ya Kanana, eo ke e neang bana ba Iseraele hore e be ya bona.

⁵⁰ O tla shwela hodima thaba eo, eo o tla nyolohela hodima yona, mme o orosetswe setjhabeng sa heno, jwalokaha Arone, moholwane wa hao, a ile a shwela thabeng ya Hore, le yena a orosetswa setjhabeng sa habo.

⁵¹ Le ne le ntshitelwe le le hara bana ba Iseraele, ha le le metsing a Meriba e Kadeshe, lehwatateng la Sine. Le ne le se ke la nkgalaletsa hara setjhaba sa Iseraele.

⁵² Ka baka leo, naha eo o tla e bonela hole, empa o ke ke wa kena naheng eo, eo ke e neang bana ba Iseraele.”