Sefela sa Salomone 1 - Sesotho 1909/1961 (SO)

¹ Sefela sa difela, sa Salomone.

² Ake a nkake ka kako tsa molomo wa hae! hobane lerato la hao le monate ho ena le veine.

³ Menkwane ya hao e nkga hamonate; lebitso la hao eka setlolo se qhatseditsweng; barwetsana ba o rata ke hona.

⁴ O nkgule, mme re tla phalla kamora hao. Morena o ntlisitse dikamoreng tsa hae. Re tla thaba, re nyakallele wena, re rorise lerato la hao le fetisang veine. Ba o rata ka lerato la nnete.

⁵ Baradi ba Jerusalema, ke motshwana, empa ke motle jwaloka ditente tsa Kedare, jwaloka dilepello tsa tente ya Salomone.

⁶ Le se ke la ntadima ha ke le motshwana, hobane ke tjhele ke letsatsi; bara ba mmè, ha ba nkgalefetse, ba mpeile ho disa merara, mme merara e leng ya me ka sebele ha ke a e disa.

⁷ Wena ya ratwang ke moya wa me, mpolelle moo o disang, moo o bothisang mohlape wa hao motshehare; hobane nka tshwana keng le mosadi ya lelerang hara mehlape ya dithaka tsa hao?

⁸ Ha o sa tsebe, wena e motle hara basadi, o latele mehlala ya dinku, o fudise dipotsanyane tsa hao pela maphephe a badisa. —

⁹ Thatohatsi ya ka, ke o tshwantsha le semathi sa dipere tsa makoloi a Faro.

¹⁰ Marama a hao a matle dipakeng tsa meqhaka, le molala wa hao dipakeng tsa masihla.

¹¹ Ke tla o etsetsa meqhaka ya kgauta e homilweng ka mahlo a silefera.

¹² Morena ha a ntse a dutse tafoleng, nareda ya me e ntse e ntsha monko wa yona.

¹³ Moratuwa wa me o ho nna jwaloka letlenyana la mirra le hoketsweng sefubeng sa me.

¹⁴ Moratuwa wa me o ho nna jwaloka lesihla la kiprese merareng ya Ene-Gedi.

¹⁵ Bona, o motle, thatohatsi ya ka, o motle; mahlo a hao eka a leebakgorwana.

¹⁶ Moratuwa wa me, bona, o motle, o a rateha; tao tsa rona ke botala.

¹⁷ Difero tsa ntlo ya rona ke dikedare, mme maballo a rona ke dikiprese.