Jakobo 4 - Sesotho 1909/1961 (SO)

Ho tshajwe ditakatso tse sa lokang.

¹ Dintwa le diphapang tse hara lona di tswa kae? Na ha di tswe ditakatsong tsa lona tse lwanang dithong tsa lona na?

² Le a lakatsa, mme ha le rue letho; le a bolaya, le na le mona, mme le sitwa ho fumana; le a lwana, le a tseka; ha le na letho kahobane ha le kope.

³ Le a kopa, mme ha le fuwe, kahobane le kopa hampe, ho nkela ditakatso tsa lona.

⁴ Banna le basadi ba bafebi, hleka ha le tsebe hoba ho rata lefatshe ke ho lwantsha Modimo na? Efela ya phehellang ho iketsa motswalle wa lefatshe o ipea sera ho Modimo.

⁵ Na le lekanya hoba Lengolo le bolela lefeela na? Moya o ikahetseng ho rona na o re isa mohonong na?

⁶ Athe o re ekeletsa tshitso, mme ke ka baka leo Lengolo le reng: Modimo o hanela baikgohomosi, empa o hauhela ba ikokobetsang.

⁷ Ka baka leo, ipeeng katlase ho Modimo, le hanele Diabolose, mme o tla le balehela.

⁸ Atamelang Modimo, mme o tla le atamela. Baetsadibe, hatlelang, mme lona ba pelo di pedi, hlatswang dipelo tsa lona.

⁹ Hlomohang dipelo, le lle, le bokolle; ditsheho tsa lona di fetohe dillo, thabo ya lona e fetohe maswabi.

¹⁰ Ikokobetseng pela Morena, mme o tla le phahamisa.

¹¹ Le se ke la sebana, banabeso. Ya sebang ngwanabo, kapa ya ahlolang ngwanabo, o seba molao, o ahlola molao; mme ha o ahlola molao, ha o moetsi wa molao, empa o le moahlodi wa wona.

¹² Mmei wa molao o mong, ke yena ya nang le matla a ho boloka le a ho timetsa; wena o mang ha o ahlola ba bang?

Ba etsang merero ba ke ba e rere ka ho e bea tisong ya Modimo.

¹³ Jwale, ke bua le lona ba reng: Kajeno, kapa hosasane, re tla ya motseng wa hore hoitseng, re tla dula teng selemo se le seng, re tla hweba teng, re tla rua;

¹⁴ athe ha le tsebe se tla hlaha hosasane. Hobane bophelo ba lona ke eng? Ke mohodi feela o bonahalang ka motsotso o se okae, o ntoo nyamela.

¹⁵ Empa jwale le ka be le re: Ha Morena a rata, ha re sa le teng, re tla etsa hore le hore.

¹⁶ Jwale, le ithabela meithorisong ya lona; ho ithorisa hohle ho jwalo ho hobe.

¹⁷ Efela ya tsebang ho etsa botle, mme a sa bo etse, yena o etsa sebe.