Dipesaleme 85 - Sesotho 1909/1961 (SO)

Thapelo ya setjhaba ha se kopa hore se boele se hauhelwe.

Ho monga baphokodi. Pesaleme ya bana ba Kore.

¹ Jehova, o hlohonolofaditse naha ya hao, o kgutlisitse batshwaruwa ba Jakobo;

² o tlositse makgopo a setjhaba sa hao, o apesitse dibe tsohle tsa sona. (Sela.)

³ O kgutsisitse bohale bohle ba hao, o timile mollo wa kgalefo ya hao.

⁴ O boele o re ahise, Modimo wa poloko ya rona, o fedise ho itshena ha hao bakeng sa rona.

⁵ Na o ka re halefela kamehla, wa tiisa bohale ba hao kamehla le mehla na?

⁶ Na o ke ke wa boela wa re pholosa, hore setjhaba sa hao se tle se o thabele na?

⁷ Oho Jehova, o re bontshe mohau wa hao, o re sitse ka poloko ya hao.

⁸ Ke tla mamela se bolelwang ke Modimo Jehova; hobane o re, kgotso e be ho setjhaba sa wona, le ho bakgethwa ba hae, ba mpe ba se ke ba kgutlela bohlanyeng!

⁹ Ruri, poloko ya wona e haufi le ba o tshabang, kganya e tle e ahe naheng ya rona.

¹⁰ Mohau le nnete di teane, ho loka le kgotso di akane;

¹¹ nnete e mela lefatsheng, mme ho loka ho tadimile ho le mahodimong.

¹² Efela, Jehova o tla nea lehlohonolo, naha ya rona e ntshe ditholwana tsa yona.

¹³ Ho loka ho tla tsamaya pela hae, ho re etsetsa tsela mehlaleng ya hae.