Dipesaleme 69 - Sesotho 1909/1961 (SO)

Thapelo ya motho ya leng mahlomoleng.

Ho monga baphokodi. Ka pina ya Shoshanime (mehaladitwe). Pesaleme ya Davida.

¹ Modimo, mpoloke! hobane metsi a batla ho nka bophelo ba ka!

² Ke tetebetse mokoting wa diretse, seretse se nyebella tlasa maoto a ka; ke tetebetse metsing a bodiba; maqhubu a wona a nkimela.

³ Ke kgathaditswe ke ho howa, mmetso wa ka o omeletse; mahlo a ka a fifala, ha ke ntse ke lebeletse Modimo wa ka.

⁴ Ba ntlhoileng feela ba bangata ho feta diqoba tsa moriri wa hlooho ya ka; bao e leng dira ho nna feela, ba ratang ba ka mpolaya, ba matla haholo; ke lefiswa le seo ke sa se utswang.

⁵ Oho Modimo, o tseba diphoso tsa ka, le ditlolo tsa ka ha di a pateha ho wena.

⁶ Morena, Jehova wa makgotla, ba o tshepang ba se ke ba hlajwa ke dihlong ka baka la ka; Modimo wa Iseraele, ba o batlang ba se ke ba swaba ka baka la ka.

⁷ Hobane ke ka baka la hao ke jereng ditshomo; sefahleho sa ka se kwahetswe ke dihlong.

⁸ Ke fetohile osele ho banabeso, ya sa tsejweng ho bara ba mme.

⁹ Hobane tjheseho ya ntlo ya hao e ntjele, mme dinyefolo tsa ba o nyefolang di nkwela hodimo.

¹⁰ Ha ke ntse ke lla ke itima dijo, hoo ho mphetohela nyediso;

¹¹ ha nka ikapesa ka lesela le mahwashe le teng ke tsosa ditshomo tsa bona.

¹² Ke entswe sesomo sa ba dutseng kgorong, matahwa a mpina ka dipina.

¹³ Haele nna, thapelo ya ka e nyolohela ho wena, Jehova, nakong e tshwanelehang. Oho Modimo, o nkarabe ka bongata ba mehauhelo ya hao, ka nnete ya poloko ya hao.

¹⁴ O nnyolle diretseng, mme o se ke wa ntesa ka tetebella teng, ke be ke bolokwe ho ba ntlhoyang le bodibeng ba metsi,

¹⁵ ke se ke ka imelwa ke maqhubu a wona, ke se ke ka hohlometswa ke bodiba, lebitla le se ke la kopetsa molomo wa lona hodima ka.

¹⁶ Nkutlwe, Jehova, hobane mohau wa hao o molemo; o retelehele ho nna ka mehauhelo ya hao e meholo,

¹⁷ mme o se ke wa patela mohlanka wa hao sefahleho sa hao, hobane ke matswalong; phakisa o nkarabe!

¹⁸ Atamela moya wa ka, o o boloke; o ntopolle ka baka la boithoriso ba dira tsa ka!

¹⁹ O tseba sekgobo sa ka le dihlong tsa ka le ho nyefolwa ha ka; ba ntwantshang ba pela mahlo a hao kaofela.

²⁰ Dinyefolo di robile pelo ya ka, ke bohloko haholo; ke lebeletse ba nkgauhelang, mme ba hlokahetse; ka batla le batshedisi, mme ha ke bone le a mong.

²¹ Ba nneile nyoko e be dijo tsa ka, mme ho nyorweng ha ka ba nnositse asene.

²² Tafole ya bona a e ke e ba fetohele lemena le sefi boiketlong ba bona!

²³ Mahlo a bona a ke a ntshofale, a lese ho bona; matheka a bona a ke a kgwehle kamehla!

²⁴ O tshollele bohale ba hao hodima bona, mollo wa kgalefo ya hao o ba fihlele!

²⁵ Meaho ya bona e ke e fetohe dithako, ho se ke ha eba motho ya dulang ditenteng tsa bona!

²⁶ Hobane ba hlorisa eo o mo otlileng, ba rata ho bolela mahloko a bao o ba hlabileng.

²⁷ O eketse makgopo a bona ka makgopo a mang, ba se ke ba eba le kabelo ho lokeng ha hao!

²⁸ Ba hlakolwe bukeng ya ba phelang, ba se ke ba ngolwa le ba lokileng!

²⁹ Haele nna, ke hlomohile, ke bohloko; thuso ya hao, Modimo, e ke e mpee nqalong e phahameng.

³⁰ Ke tla rorisa lebitso la Modimo ka dithoko, ke le tumise ka dipoko;

³¹ hoo ho tla kgahlisa Jehova ho fetisa dipoho, dipoho tse dinaka le ditlhako.

³² Bahlomohi ba tla bona hoo, ba thabe. Pelo tsa lona a di ke di phele, lona ba batlang Modimo!

³³ Hobane Jehova o mamela ba lesitsi, mme ha a nyedise ba hae ba holehilweng.

³⁴ Mahodimo a a ke a mo rorise, le lefatshe, le mawatle, le tse utlwang ho tsona kaofela!

³⁵ Hobane Modimo o tla boloka Sione, o tsose metse ya Juda; ba tla aha ho yona, e boele e be leruo la bona;

³⁶ e tla ba lefa la ditloholo tsa bahlanka ba wona, mme ba ratang lebitso la wona ba tla nne ba ahe ho yona.