Dipesaleme 56 - Sesotho 1909/1961 (SO)

Tshepo ya motho ya balehang a se na molato.

Ho monga baphokodi. Sefela sa Davida, sa mohla Bafilista ba mo tshwereng Gathe; se tle se binwe ka pina ya Jonath-Eleme-Rehokime (leeba la difate tsa diterebinthe tse hole).

¹ Oho Modimo, o nkgauhele, hobane batho ba mpefeletswe, ba ntwantsha tsatsi lohle, ba ntuba;

² ba ntwantshang ba mpefellwa tsatsi lohle, ba bangata ba ntwantshang ka boikgohomoso.

³ Empa ka letsatsi la tshoho, ke bea tshepo ya ka ho wena.

⁴ Ke ithorisa ka Modimo, ka lentswe la wona; ke itshepetse Modimo, ha ke tshabe letho: motho a ka nketsang?

⁵ Ba tsietsa, ba senya ditaba tsa ka ka dinako tsohle; mehopolo ya bona kaofela e lebile tshenyehong ya ka.

⁶ Ba lalla, ba nanara, ba hlwela mehato ya ka, hobane ba lebeletse sebaka sa ho tlosa bophelo ba ka.

⁷ Ba tshepile hobane ba tla phonyoha ka bokgopo ba bona. Oho Modimo, o dihele ditjhaba ka bohale ba hao!

⁸ O bala dipaleho tsa ka; o bokelle meokgo ya ka lekukeng la hao. Ha ke re, e ngodilwe bukeng ya hao na?

⁹ Ka letsatsi leo ke tlang ho bitsa ho wena, bao e leng dira ho nna ba tla suthela morao. Hoo ke ho tsebang, ke tseba hobane Modimo o na le nna.

¹⁰ Ke ithorisa ka Modimo, ka lentswe la wona; ke ithorisa ka Jehova, ka lentswe la hae.

¹¹ Ke itshepetse Modimo, nke ke ka tshaba letho: motho a ka nketsang?

¹² Oho Modimo, ke tlamilwe ke dikano tseo ke di entseng; ke tla o buseletsa diteboho.

¹³ Hobane o lwetse bophelo ba ka lefung, o bolokile maoto a ka ho weng, ke tle ke tsamaye pela hao, Modimo, leseding la ba utlwang.