Dipesaleme 44 - Sesotho 1909/1961 (SO)

Thapelo ya Baiseraele ha ba hlotswe ke dira, leha ba sa ntsane ba tshepile Jehova.

Ho monga baphokodi. Pesaleme ya bana ba Kore. Sefela.

¹ Modimo, re utlwile ka ditsebe tsa rona, bontata rona ba re boleletse diketso tse phahameng tseo o di entseng mehleng ya bona, mehleng ya boholoholo.

² O lelekisitse ditjhaba ka letsoho la hao, hore o ba bee tulong tsa tsona; wa fedisa ditjhaba, hore o ba atise.

³ Hobane ha ba ka ba hapa naha ka lerumo la bona, ha ba ka ba bolokwa ke letsoho la bona; empa ke ka le letona la hao, ke ka letsoho la hao le ka kganya ya sefahleho sa hao, hobane o ne o ba rata.

⁴ Modimo, ke wena Morena wa ka! o laole topollo ya Jakobo!

⁵ Ka wena re tla diha dira tsa rona, ka lebitso la hao re hatakele ba re tsohelang matla.

⁶ Hobane ha ke tshepe seqha sa ka, ha ke bolokwe ke lerumo la ka;

⁷ empa ke wena ya re namolelang direng tsa rona, ya tsielehisang ba re hloileng.

⁸ Re ithorisa ka Modimo ka matsatsi wohle; re tla roka lebitso la hao ka ho sa yeng kae! (Sela.)

⁹ Empa jwale, o re lahlile, o re apesitse dihlong, o lesitse ho tsamaya le makgotla a rona;

¹⁰ o re balehisitse pela dira, ba re hloileng ba ikela le kgapo;

¹¹ O re neetse bona jwaloka dinku tse hlajwang, wa re qhalanyetsa hara ditjhaba;

¹² o rekisitse lefeela ka setjhaba sa hao, ha o a ka wa thethesa theko ya sona.

¹³ O re etsa ntho e nyediswang ho ba ahileng pela rona, le tlako le sesomo ho ba re kopileng;

¹⁴ o re etsa tshomo hara ditjhaba, le komo ya hlooho hara merabe.

¹⁵ Dihlong tsa ka di pela mahlo a ka kamehla, maswabi a apesitse sefahleho sa ka,

¹⁶ ha ke utlwa lentswe la mosomi le la motlaki, ha ke bona sera le mohlorisi.

¹⁷ Re hlahetswe ke tseo kaofela; leha ho le jwalo, re ne re sa ka ra o lebala, re sa ka ra tlola selekane sa hao;

¹⁸ pelo tsa rona di ne di sa ka tsa o furalla, le maoto a rona a sa ka a kgeloha ditsela tsa hao,

¹⁹ ha o tla re thuhakanya dinaheng tsa diphokojwe, wa re apesa ka moriti wa lefu.

²⁰ Hola ra lebala lebitso la Modimo wa rona, ra emisetsa modimo osele matsoho a rona,

²¹ na Modimo o ka be o sa ka wa tseba na? Athe o tseba makunutu a dipelo.

²² Empa feela, re bolawa ka baka la hao ka matsatsi wohle, re lekantswe le dinku tse hlajwang.

²³ Phaphama! o robaletseng, Morena? O phaphame, o se ke wa re lahla ka ho sa feleng!

²⁴ O re patellang sefahleho sa hao, o leballang bomadimabe ba rona le ho tujwa ha rona?

²⁵ Hobane meya ya rona e tepelletse leroleng, mmele ya rona e kgomaretse mobu.

²⁶ Tsoha ho tla re thusa; o re namolele ka baka la mohau wa hao!