Dipesaleme 149 - Sesotho 1909/1961 (SO)

Ho roriswa Modimo o neang setjhaba sa wona hlolo.

¹ Bokang Jehova! Binelang Jehova sefela se setjha, a nne a rokwe phuthehong ya bakgethwa ba hae.

² Iseraele a ke a ithabelle Mmopi wa hae; bana ba Sione a ba ke ba hlasimolohele morena wa bona!

³ Ba ke ba roke lebitso la hae ka mehobelo, ba mo rorise ka modumo wa meropa le wa diharepa!

⁴ Hobane Jehova o thabela setjhaba sa hae, o kgabisa bahlomohi ka ho ba pholosa.

⁵ Bakgethwa ba hae a ba ke ba ithabelle kganya, a ba ke ba tshele ditlatse tsa nyakallo malaong a bona.

⁶ Dithoko tsa Modimo di ke di be melomong ya bona, le marumo a mahale a mabedi diatleng tsa bona, ho sebetsa phetetso ditjhabeng,

⁷ le kgalemelo merabeng, ho tlama marena a tsona ka mahlaahlela,

⁸ le mahosana a tsona ka ditshepe;

⁹ ho phetha ho bona kahlolo e ngodilweng. Ke yona kganya e boloketsweng bakgethwa ba hae kaofela. Bokang Jehova!