Dipesaleme 130 - Sesotho 1909/1961 (SO)

Dillo tsa motho ha a le mahlomoleng a tshabehang.

Sefela sa Mahalothe.

¹ Jehova, botebong ba bodiba ke bitsa ho wena!

² Morena, utlwa lentswe la ka; ditsebe tsa hao a di ke di sekehelwe thapelo ya ka!

³ Jehova, ha o ka lotolotsa makgopo, ke mang ya ka emang pela hao, Morena?

⁴ Empa tshwarelo e teng ho wena, o tle o tshajwe.

⁵ Ke itshepetse Jehova, moya wa ka o mo tshepile, ke itshepisa ka pallo ya hae.

⁶ Moya wa ka o lebeletse Morena ka tebello e fetisang ya ba lebellang meso, ya ba lebellang meso.

⁷ Iseraele, o itshepele Jehova, hobane mohau o teng ho Jehova; topollo e kgolo e teng ho yena.

⁸ Ke yena ya tlang ho lopolla Iseraele makgopong a hae kaofela.