Deuteronoma 34 - Sesotho 1909/1961 (SO)

Ho shwa ha Moshe.

¹ Moshe a tloha mahwatateng a Moabe, a nyolohela thabeng ya Nebo, qhoweng ya Pisga malebana le Jeriko; Jehova a mmontsha lefatshe lohle: naha yohle ya Gileade ho isa Dane,

² le naha yohle ya Nefthali, le naha ya Efraime, le ya Manasse, le naha yohle ya Juda, ho isa Lewatleng la Bophirimela,

³ le naha e ka nqa borwa, le naha ya Jordane, le lehwatata la Jeriko, motse wa dipalema, ho isa Tsoware.

⁴ Jehova a re ho yena: Ke lona lefatshe leo ke anetseng Abrahama, Isaaka le Jakobo, ka re: Ke tla le nea ditloholo tsa lona. Ke o bontsha lona, o tle o le bone ka mahlo; empa u ke ke wa kena ho lona.

⁵ Moshe, mohlanka wa Modimo, a shwela hona teng, naheng ya Moabe, ka taelo ya Jehova.

⁶ A patwa naheng ya Moabe, sekgutlong se lebaneng le Bethe-Peore; empa ha ho motho ya tsebileng lebitla la hae ho fihlela letsatsing la kajeno.

⁷ Mohla Moshe a shwang, o ne a le dilemo tse lekgolo le nang le mashome a mabedi; mahlo a hae a ne a eso ho fifale; mme matla a hae a ne a eso ho kokobele.

⁸ Bana ba Iseraele ba llela Moshe, mahwatateng a Moabe, ka matsatsi a mashome a mararo; matsatsi a dillo le a bofifi ba Moshe a ba a fela.

⁹ Haele Joshua, mora Nune, o ne a tletse moya wa bohlale; hobane Moshe o ne a mmeile matsoho hodimo; bana ba Iseraele ba mo utlwa, mme ba etsa jwalokaha Jehova a ne a laetse Moshe.

¹⁰ Ha ho a ka ha boela ha eba moporofeta Iseraeleng ya jwaloka Moshe, eo Jehova a mo tsebileng, sefahleho se tadimane le sefahleho.

¹¹ Ha ho e mong ya ileng a tshwana le yena ka dipontsho tsohle, le mehlolo eo Jehova a mo romileng ho e etsa naheng ya Egepeta, ho Faro, le ho bahlanka ba hae kaofela, le ho naha ya hae yohle;

¹² le ka tsohle tseo a di entseng ka letsoho le matla, le ka letsoso lohle le leholo leo Moshe a le hlahisitseng pontsheng ya Baiseraele bohle.